Mahrez-a'n City a pan dawn

Premier League champion Manchester City chuan player thar pahnih an nei dawn tih a chiang tawh. Leicester City winger Riyad Mahrez leh Napoli midfielder Jorginho te chu kar leh chhungin inremna an neih fel pui hman tura ngaih a ni.

Kum 27 mi Mahrez hi pound maktaduai 60 man vel tura ngaih a ni a, Arab sum hmanga siam len City hian Italian club aṭanga Jorginho lalut turin pound maktaduai 42 an sen a ngai dawn bawk.

Kumin Janaury thla khan Mahrez hian Manchester City a zawm hman teuh hle. Algerian international hian chhuah a duh thu sawi lang hial mah se Foxes lamin an chelh a, season tharah erawh Pep Guardiola kaihhruaina hnuaiah a khel dawn tih a chiang ta.

2014 khan Mahrez hian French club Le Havre aṭangin Leicester City a zawm a, English club tan hian match 179 a khelh aṭangin goal 48 a khung tawh. Kum 2016 khan Foxes hi league nomawi chawipuiin, an champion theih nan hian goal 17 a khung–PFA Players' Player of the Year leh BBC African Footballer of the Year atan thlan a ni.

Season liam ta khan inelna hrang hrangah match 41 khelin goal 13 a khung leh a, goal khung bakah ṭhiante khung tur siamsak thei tak a nih avangin Man City bakah hian Arsenal pawhin lakluh tumin an dawr a, Italian club hlun AS Roma pawhin an lo dawr tawh bawk.

Mahrez bakah Man City hian Jorginho an hnaih tawh hle, Italy international Jorginho hian 2014 aṭangin Napoli tan a khel ṭan a, nikum November thla khan City nen Champions League-a an inkhelh ṭumin goal a khung–season liam ta khan match 36 khelin Spanish manager Pep-a'n a theihna san zia a hmuh hmaih lo.

Jorginho leh Mahrez te hi June 14 aṭanga khelh ṭan tur FIFA World Cup-ah an inlan dawn lo a, season thara chona hmachhawn turin Man city lamah inbuatsaihna hun an nei ṭha thei dawn a ni.