I League khel tur Real Kashmir
Season thar atana I League club thar tur a chiang a, Real Kashmir chuan Nilaini zan khan Hindustan FC 3-2 a hnehin second division champion an ni.
I League 2nd Division champion ni tur hian Hindustan FC-in chak ngei ngei an mamawh a, Real Kashmir tan draw a tawk thung. Minute 90 an khelh zawh meuh chuan chak mamawh Hindustan an tlawm a, Kashmir club an chak.
Season tharah chuan Sinagar khawvawtin I League a thleng tawh dawn tihna a ni a, kai thar mah ni se Real Kashmir hmachhawn hi a hautak dawn tih a chiang.
Inkhel chu
Real Kashmir-in draw a tawk tih an hriat avangin defensive game an khel a, counter attack hmanga nawr let chu an hna a ni. Minute 22-naah Ifham Tariq Mir hmangin hmahruaina goal an khung a, Delhi club-in minute 34-naah Kushant Chauhan hmangin an chhanglet.
Hindustan an phur leh ṭan dawn chauh a, an hlim chhung erawh a rei lo. Minute ruk hnu lawkah Danish Farooq chuan Srinagar club tan an goal hnihna a rawn khung leh a, second half-a luhtir Nadong Bhutia-a'n goal dang a rawn khung ve leh meuh chuan chak tur a chiang tawh.
Delhi club erawh beidawng duh loin an nawr chhunzawm a, first half-a si phurh suttu Kushant Chauhan bawkin a tauh goal - mahse Hindustan-in an goal hnihna an khung hi minute 80-na a ni tawh a, comeback turin hunin a daih tawh lo.
Zinkawng chu
I League second division-ah team 18 an tel a, a tirah preliminary round khelin group pathumah ṭhen hran an ni a, group tina hmahruaitu ṭheuh leh pahnihna ti ṭha berin final round an lut.
Group tinah hian team paruk zel an awm a, Indian Super League club reserve team pasarih chu he inelnaah hian an tel ve a, final round erawh an lut thei lo. Group aṭang hian Manipur club Trau leh Real Kashmir chu hmahruaitu nichunga final round lut an ni.
Bangalore club Ozone FC chu group B-ah pahnihna ni mah se hmahruaitu Kerala Blasters reserves-in final round an luh theih loh avangin an lut a, Hindustan hi pahnihna pathum zinga tih ṭhat ber vanga lut an ni bawk. Final round-ah team pali hi an inkhel kual leh a, point hmu sang ber chu I League khel turin an tling.
Kashmir bihchianna
Kum 2004-a din club hi Kashmir Leopards tia hminglem pek an ni a, I League khelh tum hian second division lamah an lo inlan fo tawh ṭhin. Tun season-ah I League khel tura an inpetkai tak avangin Jammu and Kashmir aṭanga I League khel tura tling hmasa ber an ni.
Nigerian defender Loveday Enyinnaya chu Kashmir club-ah hian captain a ni a, Royal Wahingdoh leh Minerva Punjab tan pawha khel tawh defender hi 2015-16 I League-a RG Stadium-a Sporting Goa tana Aizawl FC lama goal khungtu kha a ni a, 2-1 in hemi ṭum hian an chak.
I League club thar tan Mumbai City FC leh Atletico de Kolkata tana khel tawh Nadong Bhutia chu player pawimawh zinga mi a ni a, tun dinhmunah India ram pum huapa hriat hlawh player an kawl tam lo.
Rangers legend
Real Kashmir coach hi David Robertson a ni a, Leeds United tan pawha lo khel tawh player hi Indian football-ah hriat hlawh tak a ni lo - Europe-a a tawnhriat neih erawh a ropui hle.
Player a nih laia left back-a khel ṭhin coach hian Scottish club ṭha Aberdeen aṭangin a career a ṭan a, kum 1991 khan £970,000-in Rangers a pan. Rangers-ah hian Scottish Premier Division (6), Scottish Cup (3) leh Scottish League Cup (3) nomawi a chawi a, Aberdeen tan Scottish Cup leh Scottish League Cup a chawi hman bawk.
Scottish League XI-ah hial lo lang tawh defender hian Leeds United chu 1997 khan £500,000-in a zawm a, a season hmasa berah league match 26 khel nghal mah se Elland Road-ah kum li a cham chhungin hliam vangin a season hmasa ber bak a inlan tawh lo.
Coaching lam...
Robertson hian Scottish League Two club Elgin City aṭangin a coaching career a ṭan a, North of Scotland Cup-ah nomawi a chawipui.
Scotland tana vawi thum inlan defender hian Leeds-ah inkhelh chawlhsan zet mah se 2002 khan player/assistant manager nichungin Scottish Football League club Montrose a zawm leh a, a cham rei lo.
Kum 2013 khan USL Pro club Phoenix FC a enkawl a, USL Pro hi USA second division a ni. January 2017 khan Real Kashmir enkawl tur hian ruat a ni a, tunah chuan I League hial a inhlankaipui ta.