Huddersfield tan Wagner a rinawm

Premier League club Huddersfield Town boss David Wagner chuan kum thum dang cham chhunzawm turin contract thar a ziak a, 2021 thleng English club-ah hian a cham dawn tihna a ni.

Wagner bakah hian coa­ching staff dang Christoph Buehler leh Andy Hughes te pawhin 2021 thleng atan contract thar an ziak ve bawk. Wagner hian 2016-17 season ah khan Huddersfield hi Premier League-ah a inhlankaipui a, a season hmasa berah hian 16-na nichungin season an khar.

Kum 46 mi manager chuan, "He club-a cham zel tura thutlukna siam hi ka tan thil harsa a ni lo. Ka ṭhiante Christoph leh Andy ten chairman Dean Hoyle nena inpawhna kan neih hi a thuk em em a ni. Kum hnih leh a chanve chhungin hna ropui tak kan thawk a, kan hma hun atan kan phur takzet a ni," a ti.

Wagner hian November 2015 khan Huddersfield hi a zawm a, Championship-ah a inhamtanpui. Thla 12 hnuah a vawi khat nan Premier League a tlinpui leh a, Town chairman Hoyle chuan Wagner awm lo se Premier League an kai loh tur thu a sawi.