Nadal thlipui a tleh chhunzawm

World number 1 Rafael Nadal chuan French Open nomawi a kawl lai humhim turin hmalam a pan zel. Ningani zan Roland Garros, Paris-a inkhelah Nadal hian Guido Pella chu straight set a hnehin third round a inhlangkai.

Suzanne Lenglen Court-ah Nadal hian world number 78 Pella hi darkar hnih leh minute thum chhung lekin 6-2, 6-1, 6-1 in a sawp a, zanin hian third round-ah Richard Gasquet nen an intawng leh ang.

Khawtual tlangval Gasquet hian Malek Jaziri chu 6-2, 3-6, 6-3, 6-0 in a hneh ve bawk. An rama khel a nih avangin mipui lamin Gasquet an ṭan hle a, tun hma lama vawi 15 a hneh loh tawh Nadal lakah pawh fans puihna chu a hmu ṭha dawn.

Ṭhian dun
Nadal leh Gasquet te hi naupan lai aṭanga inṭhian ṭha tak an ni. Junior tennis aṭanga inkhel dun tawh ṭhin niin, professional tennis an khelh hnuah Nadal a chungnung ta hle a, an intawn tawhnaah a la chak fai vek. French Open bikah hian 2005 third round-ah khan an lo inkhel tawh bawk a ni.

Grand Slam vawi 16 champion tawh Nadal chuan, "Kum 12 mi vel kan nih lai aṭang tawhin kan inhria a, mi rilru tluang leh rilru sukthlek ṭha tak a ni. Ṭhian ṭha tak pahnih kan inkhel dawn a ni a, ka hun tawn tawh zinga pawimawh ber zinga mi ka tawn chhoh lai a nih bakah a tan pawh French Open hi chu hmun hlu tak a ni bawk," tiin a sawi.

Kum 31 mi Gasquet pawhin Nadal nen an inkhelh tur chungchang sawiin, "Ka theihtawp ka chhuah dawn, Rafa hi player ṭha chungchuang a nih avangin rinkai zawk a ni tih chu ka hria. Centre Court-ah kan inkhel dawn a, mipui tam tak hmaah ṭha taka ka khelh theih ka beisei," a ti.

French Open bikah chuan Nadal hmachhawn hi thil huphurhawm ber a ni. Spanish tlangval Nadal-a'n major title 16 a lak zinga 10 zet chu Roland Garros-ah hian a ni a, clay court inelna lian berah hian match 81 a khelh tawhah vawi hnih chiah chak loh a la nei.

Inkhel dang
Ningani zan inkhel dangah seeded pathumna Marin Cilic chuan Hubert Hurkacz lakah fiahna hautak paltlangin 6-2, 6-2, 6-7 (3-7), 7-5 in hnehna a chang hram. US Open champion hlui hian Steve Johnson a hmachhawn leh ang.

Seeded pangana Juan Martin del Potro pawhin kum 36 mi Julien Benneteau chu 6-4, 6-3, 6-2 in a hneh. Benneteau tan a French Open hnuhnung ber a ni a, second round-ah a hun a tawp.

French tlangval tennis khel thiam Benneteau chuan, "Kum 10 mi chauh ka nih lai khan stadium-ah hian ṭhuin engtik niah emaw chuan ka la inkhel ve ngei ang ka ti ṭhin. Ka naupan laia ka duhthusam kha a takin a thleng tawh a, ka theihnghilh ngai tawh lo ang," a ti. Del Potro pawhin Benneteau chu kum upa tawh tak ni mah se hmachhawn a harsat thu a sawi ve bawk.

Tun hnaia rawlthar beiseiawm chhuak thar Denis Shapovalov erawh a mumang a tawp. Kum 19 mi Shapovalov hian a vawi khat nan French Open a khel a, second round thleng ve mah se seeded chang phak lo Maximilian Marterer lakah 7-5, 6-7 (4-7), 7-5, 6-4 in a chak lo.

Seeded parukna Kevin Anderson pawhin Pablo Cuevas lakah 6-3, 3-6, 7-6 (7-5), 6-4 a hnehna changin, Dominic Thiem chuan Stefanos Tsitsipas 6-2, 2-6, 6-4, 6-4 in a hneh ve bawk.