Chanmari coach thar Tawia
Mizoram Premier League club Chanmari FC chuan 2018-19 MFA season chhunga head coach ni turin Lalruatliana Sailo (Tawia) an lalut a, Vaivakawn tlangval Tawia hian H. Vanlalthlanga a thlak ang.
Tawia hi AFC B coaching license nei phak Mizo tlemte zinga mi a ni a, AIFF' D License Instructor awmchhun a ni bawk. A inkhelh hunlaia striker ṭha Tawia hian MPL ṭantirhah RS Annexe a enkawl a, hemi hnu hian FC Kulikawn-ah player anga khel lehin season liam ta khan Ramhlun North a enkawl.
Chanmari FC managing board chairman Zothantluanga chuan, "Tawia hi coach ṭha tak a ni a, tun hma pawha kan lo awh em em ṭhin a ni. A thiamna bakah hlawhtlin a duhna thinlung hi kan duh a, coaching ṭha leh tunlai mila team enkawl kan beisei dawn a ni. Chanmari FC hian trophy kan lak lohna a rei tawh a; Pathian kaihhruaina nen coach thar Tawia ho hian hlawhtling leh turin theihtawp kan chhuah dawn," tiin nomawi duha an tuihal thu a sawi.
Season hman zawh takah Chanmari FC-in nomawi an chawi lo a, amaherawhchu hemi hma hian MPL5-ah Lalsangzuala Hmar hoa an champion avangin nomawi an chawi lohna hi a la rei hran lo. Chutihrualin season liam ta khan Chanmari hian Chhinga Veng FC leh Aizawl FC te an elpha lo a, Tawia hoin team dang chunga len an tum leh ang.
Ramhlun North coach hlui Tawia chuan "Chanmari FC-in ka chunga rinna an nghat hi ka lawm em em a, hetiang club lian ka zawm thei hi ka phurin ka tan chuan chona lian tak a ni. Mizoram State Sports Council a kan hotuten football hmasawn nan tiin phal taka Chanmari FC zawm min phalsak hi kan lawm bawk. Ka player neih turte la chianglo mah se nomawi la ngei turin hma ka la dawn a, kan theihna china sang ber phochhuah ka tum tlat dawn a ni," tiin a sawi.
Chanmari FC hian tualchhung football-ah sulhnu ṭha tak an nei a, Mizoram Premier League-ah nomawi vawi hnih an chawi tawh a, I League club Aizawl FC nen chiah nomawi vawi khat aia tam chawi thei an ni. MFA hnuaia inelna dang I Day Football, Super Cup leh MFA Cup te an chawi tawh a, Chanmari FC hian ISL club FC Pune City nen thawhona ṭha tak an nei mek a, an player ṭhahnem takin India ram club ṭha zawk an zawm tawh bawk.