Vawiinah MHIP Football semifinal
MFA leh MHIP buatsaih GIG Motors Inter Branch MHIP Football Tournament chu vawiin hian Lammualah semifinal khelh a ni dawn. Chawhnu dar 2:15-ah ITI Veng leh Kolasib Town te an inkhel ang a, tlai dar 4:30-ah Champhai Sub. Hqrs leh Zemabawk North ten final khel tur an zawng bawk ang.
MHIP Football hian lawm a hlawh a, quarterfinal-ah entu an ṭhahnem tawh a, semifinal hi Inrinnia khelh a nih dawn avangin entu an tam lehzual ang. MFA chuan hmeichhe football-a Mizoramin hma a sawn theih nan MHIP nen an thawk ho a, inelna an buatsaih hmasak ber aṭangin hmasawnna a lang ṭan nghal a, hmeichhe footballer ṭhahnem zawk hmuh tur an awm chu hmasawnna langsar ber a ni rih.
ITI Veng Vs Kolasib
ITI Veng hi team ṭha ber ni lo nachungin an pool awmna a fuh a, keeper Baby Zothankhumi a ṭhat bawk avangin match thum an khelh tawhah goal an chhuah lo a; match hnuhnung bera Armed Veng an hneh ṭumah phei chuan penalty a dang hnem hle. Chutihrualin team khaikhawmtu K. Lalhruaizeli (Nupui) hming lam hmaiha thiang lo a, Kolasib Town laka hnehna chang turin vengchhung ṭawiawmna an mamawh ang.
Kolasib Town fitness a ṭha a, hit and run in an khel a, Lalrinchhani tlan chakna chu an hmachhuan a nih rualin goal khung kawngah Lalduhawmi leh Lalnuntluangi ten an thlawp ṭha bawk. Match liah goal 15 khungin an khingpui ITI Veng ang thoin goal an la chhuah lo a, chak tura zawka ngaih an ni.
Champhai Vs Zemabawk N
Tun inelnaa team ṭha ber ang hiala chhal theih Champhai Sub. Hqrs hi senior Lalrinmawii Varte-in captain armband hrechhung player naupang zawk a rawn ho a, tlarhnungah Lalhlupuii Varte a awm a, midfield-ah Lalchhanhimi a awm bakah goal khung turin Lalhmangaihzuali te kawl avangin position tinah an ṭhaah a ngaih theih.
Zemabawk Norh khelh dan hmang leh Kolasib Town khelh dan an inzul a, an fitness chu an hmachhuan tur a ni a. An goal khung khawl Lalhumhimi'n tun inelnaah match thum lek aṭangin goal sarih a khung thei a, tun inelnaa player ṭha ber ang hiala sawi theih a nih avangin hnehna an chan theih nan Champhai lakah a chet ṭhat a ṭul ang.