CYMA Volleyball-ah Dream Final ; Zanin dar 8:00-ah Kanan Vs Bungkawn

LBS Suzuki 21st Inter Branch YMA Volleyball Tournament-ah Kanan leh Bungkawn ten straight set-in Hlimen leh Kolasib Diakkawn te an hneh a, zanin dar 8:00 hian volleyball inkhelh thiam veng pahnihin R. Dengṭhuama Hall-ah final an khel dawn.

A thiam an dang
Ningani zan khan hmeichhe semifinal khelh a ni a, Kanan-in Hlimen chu 25-13, 25-10, 25-19 in an hneh. Set hmasa berah Kanan innghahna Vardingliani chuan point 23-na hlawh chhuak turin a hlap dik a, hemi hnu hian Dingdingi hian service chhunzawmin Hlimen player-te khawih fuh hman loin ṭum hnih a tidik zawn a, set khatna an la a ni ringawt lo a, Hlimen an zam avangin an chak dawn tih a chiang nghal.

Hlimen setter-te an chet theih loh avangin kut ding leh veia hlap thei Lalnunpuii pawh a chei thei lo a, senior team-a Mizoram aiawha kal tawh pali kawltu Kananin set hnuhnung bera player naupang zawk an luhtir chungin straight set-in an la tho. India aiawh pawha khel tawh Dingdingi chu player of the night a thlan a ni.

Kolasib Diakkawnin inelna dang angin an player neih ṭhat ber an rawn thawhchhuahpui lo a, tualchhung player ṭha tamna leh ṭantu nei ṭha Bungkawnin 25-15, 25-17, 25-15 in an sawp. Bungkawn tana thu lawmawm lo awmchhun chu set hnuhnung berah F. Lalparmawii'n a ke na sa a bilh nawn a, F-i hi semifinal-ah player of the night-ah thlan a nih avangin a awm lo a nih chuan Kanan tan thu lawmawm ni ang.

Sulhnu nei ṭha pahnih
Tun ṭum CYMA Volleyball hi vawi 21-na ni mah se kum 1989 khan hmeichhe inelna a awm loh avangin tun ṭum hi a vawi 20-na chiah a ni a. Kanan Veng hian vawi 14 final lutin vawi sarih an champion a, record ṭha ber nei ṭha ber an ni a. An khingpui tur Bungkawn hi vawi nga champion tawh niin 1999, 2000 leh 2001 khan kum zawnin an champion a, final-a an hneh hi Kanan Veng vek an nih avangin final boruak sangah an zam lo ang.

Bungkawn hian tawnhriat nei ṭha F-i bakah Melody Lallawmkimi, RK Lalfakmawii leh C. Vanlalzuii te an kawl a, an ṭhat rual avangin hming aṭanga en chuan an buk a rit zawk. Kanan lamin Dingdingi thlawp turin Vanlalremruati, Zorinkimi, R. Malsawmtluangi leh R. Vanlalmalsawmi te an nei bakah Mini National neih zawh taka Mizoram setter F. Lallianchhungi an kawl bawk.

Semifinal inkhel hmuhnawm tawk loh chhan chu finalist team pahnih ṭhat vang a ni a, nomawi inchuhna a hmuhnawm dawn. Kanan leh Bungkawn ten ṭantu an nei ṭha chungin an chak chian avangin an duh angin au na hun an nei lo a, final-ah erawh au na tur a tam dawn.