LeBron ropuinain chakna keng tel lo
Basketball player awm tawh zinga ropui ber zinga mi LeBron James chuan nimin zing NBA finals game 1-ah point 51 zet lutin playoff china a luh tam ber ṭum tawng mah se Cleveland Cavaliers a chak pui zo lo.
Oracle Arena-ah champion lai Golden State Warriors a vannei zawkah an ṭang a, quarter li khelh zawhah 107-107 a an inhnehtawk hnuin 124-114 in an chak.
Game 2 hi Oracle Arena-ah bawk khelh a ni dawn a, Thawhṭanni zing dar 5:30-ah khelh a ni ang.
Inhnehtawk
NBA Finals-ah Golden State leh Cavaliers te vawi thum an inhmachhawn tawh a, Steve Kerr-a hoten vawi hnih hnehna an chang tawh a, player an neih ṭhat zawk bawk avangin GSW tan champion harsa tur niin a lang lo.
Amaherawhchu, Golden State hian an arena-a an khel chungin Cavs nen an inhnehtawk a, halftime-ah 56-56 niin hun tawpah pawh 107-107 in an la inhnehtawk tho a. Overtime-a an point luh zat chu eng pawh ni se King James a dam ṭha a nih chuan inkhelh ṭan hmaa champion chiang tawha sawi hi a la chiang lo tih a lang.
A tawpah drama
LeBron lansarh zanah hun tawp boruak a sang. Quarter linaah second 36 chiah a awm tawh tihin Kevin Durant chuan lalutin James a su a, referee-in GSW forward hi thiam loh a chantir.
Hetihlai hian Cavs hi 104-102 in hma an hruai a, ball chang chiah se chuan point hniha hma an hruaina nen chak turin an dinhmun a ṭha khawp ang. Amaherawhchu replay ennawn a nih hnuah thulukna an sut a, Durant-a'n freethrow vawi hnih lut ve vein an intluk chiah.
LeBron-a'n pui taka basket a neih hnu lawkah Curry-a'n a aia pui mahin basket a nei zui a, an foul tel bawk avangin GSW star hian freethrow a lut zui a, 107-106 in hma an hruai chiah.
Second 4.7 a la awmin Klay Thompson-a'n Cavs guard George Hill lakah a foul a, Hill hian freethrow hmasa zawk lutin 107-107 ni chiah mah se a vawi hnihna a lut lo. Cavs guard JR Smith-a'n ball chang fuhin chakna basket khungna hun ṭha nei mah se inkhel boruak sangah a talbuai a, arc pawnah chhuah puiin thutlukna dik lo a siam a, chakna hun ṭha a bawhpelh.
An insawifiah
Cavs coach Tyronn Lue chuan, "Point khatin hma an hruai emaw a tia," tiin JR Smith-a'n point dinhmun a hriat sual thu a sawi a, amaherawhchu Smith erawhin coach thusawi hi a pawmpui lo.
Smith chuan, "A dik lo, kan point hmuh zat a inang tih ka hria. Rebound kan lak avangin time out kan la turah ka ngai. KD-a'n min ven avangin tupawh khan ka shoot mai an ring lo ang," tiin a insawifiah a, timeout koh hunah coach a hamhaih niah a ngai thung.
Overtime-ah engkim a dang a, Golden State player-te kut kal a, quarter tawpa chesual Cavaliers ten bei let turin tha an nei tawh lo. GSW coach Steve Kerr chuan, "Kan khel ṭha thawkhat a, kan khel chhiaah ka ngai lo. Kan khingpui an ṭha a, awlsam turin sawi mah se a harsat zia chu a lang nghal a. Chak nawn tur chuan tun aia ṭha zawka kan khelh a ṭul dawn a ni," tiin a sawi.