Serena a hrang chhunzawm

French Open khelh mekah Serena Williams chuan hmalam a pan zel a, Ningani zan khan American nula hian seeded 17-na Ashleigh Barty chu 3-6, 6-3, 6-4 a hnehin third round a inhlangkai.

Roland Garros, Paris-ah world number 1 hlui Serena hian set hmasa ber a hloh a, mahse set hnuhnung pahnihah erawh a hun takah zel vawi khat ve ve a khingpui service chhuhsakin hnehna a chang.

Kum 36 mi Serena hian 2017 Australian Open hnua a vawi khat nan Grand Slam a khel ve leh chiah a, ṭum danga a tih loh ang takin thawmhnaw dum hlangin a inthuam nawn. Major title 23 la tawh Serena hian a match lehpekah chuan Alison van Uytvanck hnehtu Julia Goerges a hmachhawn leh dawn a ni.

Inkhel dangah world number 1 Simona Halep leh vawi hnih champion tawh Maria Sharapova te pawhin an khingpui hnehin second round an paltlang ve bawk, kumin French Open hmeichhe singles nomawi inchuh boruak a sang chho dawn hle.

Seeded pakhatna Halep hian Taylor Townsend 6-3, 6-1 in a hneh, Romanian nula Halep hian Roland Garros-ah final vawi hnih khel tawh mah se nomawi a la chawi lo a, kuminah hian rinkai zingah a tel–zaninah Andrea Petkovic nen an inkhel leh ang.

Serena ang bawka hun rei tak chhung French Open khel tawh lo Sharapova pawhin world number 52 Donna Vekic chu 7-5, 6-4 in a hneh. Russian nula Sharapova hi a kawng a harsa chho ṭan dawn, Wimbledon vawi hnih champion tawh Karolina Pliskova nen an intawng leh dawn a, a chak a nih pawhin last 16-ah Serena nen an intawng leh dawn bawk a ni.

French Open champion tawh Garbine Muguruza pawhin harsatna a la tawk lo tluang zel. Spanish nula hian 6-4, 6-3 in wildcard hmanga inlan Fiona Ferro a hneh a, Grand Slam vawi hnih champion tawh hian Sam Stosur a hmachhawn leh ang.