England tan in enchhin vawi khatna Belgium leh Portugal inkhel dawn
June 14-ah World Cup khelh a ni tawh dawn a, Russia-a inlan tur ramten inbuatsaih nan friendly match an khel ṭan hlawm tawh.
Beisei zinga tel phak lo, thawm nei na tak si England chu zanin dar 9:45 hian an inlan dawn a, Nigeria nen Wembley Stadium-ah an inkhel ang.
World Cup-a champion tum ngam Belgium leh Portugal an inkhel dawn bawk a, team pahnih intawn tur hun hi zan dar 12:15-ah a ni ang - in enchhinna ṭha tak tur a ni.
England an ṭha!
Three Lions coach Gareth Southgate-a'n squad naupang tak thlang chungin World Cup hmachhawn a tum a, player-te tawnhriat aṭanga teh chuan he team hi beisei san a harsa.
Southgate-a'n England a enkawl hnuah defender pathum chhawr chungin wing back pahnih chu tlan chhuak turin zalenna a pe ṭhin a, he formation hi World Cup-ah pawh a hman rin a ni - Nigeria lakah enchhin nan he formation bawk hi a hmang ang.
Three Lions hian an match hnuhnung pasarihah goal hnih chiah an chhuah avangin player a nih laia defender ṭhin Southgate hnuaiah tlarhnung a phui tih a hriat a, goal khung erawh an harsat thung.
Goal lam harsatna
Tlarhnung phui vang ngawtin England hi lawm tur an la ni lo. Tlarhma lamin an match hnuhnung pasariha goal an khung zat chu goal ruk chiah a ni.
Harry Kane, Jamie Vardy, Marcus Rashford leh Raheem Sterling te theihna enin England hi goal khung harsat lo tura ngaih an ni a, World Cup-ah eng ang chiah nge an nih dawn zaninah a hriat ang.
Nigeria hi awlsam taka hneh theih erawh an ni dawn lo. Ahmed Musa, Kelechi Iheanacho, Victor Moses leh John Obi Mikel te an neih avangin tun World Cup-ah beiseina sang tak an nei a, an phurna ti sang turin England hneh an tan a ṭul.
Ronaldo tel lohna
Belgium a friendly match khel turin Portugal an zin chhuak a, European champion tan captain Cristiano Ronaldo erawh a inlan a rinawm loh. Champions League final khel chau Ronaldo hian squad a la zawm lo a, Ningani kha chuan Spain-ah a bialnu Georgina Rodriguez nen hmuh an la ni.
Ronaldo tel loin Portugal hian Tunisia chu 2-2 in an inhnehtawkpui tawh a, Real Madrid forward awm loh hlana chak zawh loh zawn an duh lo ang. Belgium coach Roberto Martinez-a'n World Cup squad tur a puanin thutlukna huaisen tak a siam a, Radja Nainggolan a ko lo.
AS Roma midfielder koh loh vangin Everton boss hluiin dem rawn a hlawh a, World Cup-ah beisei ang result a neih loh chuan kawh rawn a hlawh lehzual ang - zanin hi team dinhmun siam rem ṭanna tur a ni. Vincent Kompany, Kevin De Bruyne, Toby Alderweireld leh Eden Hazard te awmna team tan Ronaldo awm lohna team ngam loh hi mualphona a ni ang.