Kenya leh All Whites intawng dawn

Hero Intercontinental Cup khelh mekah zanin dar 8:00 hian Kenya leh New Zealand an inkhel dawn a, team ṭha tak an nih avangin inkhel hmuhnawm a beisei ngam ang.

Kenya-in an ṭhat dan berin squad an hruai lo a, Tottenham Hotspur midfielder Victor Wanyama chu team captain ni mah se India-a hruai zingah a tel lo. Harambee Stars (Kenya sawina) tan Wanyama bakah an ram club ṭha Gor Mahia leh AFC Leopards player te pawh hruai an ni lo.

All Whites (NZ sawina) lam pawhin an ṭhat dan berin squad an hruai bik lo a, New Zealand chanchina squad naupang ber an hruai. All Whites coach Fritz Schmid-a'n ram tana la inlan lo player paruk a ko.

Burnley striker Chris Wood chu chawlh hahdamna hun pek a nih avangin koh zingah a tel lo a, West Ham defender Winston Reid chu hliam vangin hruai a ni lo bawk.

All Whites-in Peru nen World Cup qualifying play-off an khelh ṭuma squad aṭangin player pathum chiah an hruai a, midfielder Clayton Lewis chu inkhel bul ṭantu awmchhun a ni.