Peru captain-in World Cup khel dawn

World Cup khel thei lo tura hrem a nih hnuah Peru captain Paolo Guerrero hremna chu Swiss Court chuan a tihtawp sak lailawk a, World Cup khel thei lo tura a inngaih hnuah ram tan a inlan thei leh dawn si.

Kum 34 mi striker hi damdawi hman phal loh hmanga puh a nih avangin thla 14 chhung atan hrem a ni a, mahse Swiss Court chuan he hremna hi a hlih sak lailawk. Bayern Munich striker hlui hi World Cup qualifier-a Argentina nen an inkhelh hnuah damdawi hman phal loh a hmang tih hi hmuhchhuah a ni.

Guerrero chuan a thingpui inah he damdawi hi a tel niin a sawi a, FIFA chuan thla 12 atan a hrem hnuah thla rukah a tih hniam sak. Mahse, World Anti-Doping Agency (WADA) chuan Court of Arbitration for Sport (CAS)-ah an hek leh a, CAS hian thla 14 atan a tih tam sak thung.

Peru captain hi Group C-a an awmpui Australia, Denmark leh France captain te ṭheuhin FIFA hnenah World Cup khelh phal turin an lo dil sak tawh a, tunah chuan court inrawlhin a khelh phalsak a ni dawn ta a ni.

Swiss Court chuan Guerrero hremna CAS-in a lo tihsei sak tawh chu a dik tawk lo niin an sawi a, ram tan match 86 a khelha goal 32 khungtu striker hi 1982 hnua World Cup-a an ram inlan hmasak berah a tel ve an phal sak.