Hmeichhe Volleyball-ah Bungkawn an champion

LBS Suzuki 21st Inter Branch YMA Volleyball Tournament-ah Bungkawn chuan Kanan chu straight set 25-23, 25-12, 25-22 a hnehin hmeichhe inelnaah an champion.

Final hi Inrinni zan khan R. Dengṭhuama Hall, Mualpuiah neih a ni a. Bungkawn player F. Lalparmawii chu player of the match-ah thlan a ni a, semifinal-ah pawh F-i hi player of the match-ah thlan a ni tawh bawk.

Champion team captain Melody Lallawmkimi (MeMe-i) chu best setter-ah thlan a ni a, Lallawmkimi Khenglawt chu best spiker-ah thlan ni bawkin Bungkawnin mimal lawmman an hui vek.

Final a entlak
CYMA Volleyball-a record nei ṭha ber Kanan leh nei ṭha ber dawttu Bungkawn inkhel a nih avangin 'dream final' tih theih a ni a, first set a hmuhnawm nghal.

Bungkawn an che ṭha hret a, Kananin an hlat lo. India aiawha khel tawh Vardingliani chu Kanan tana che ṭha fal a nih rualin hun pawimawhah a tisual ve tho a, setter naupang F. Lallianchhungi te boruak sangah an talbuai avangin Bungkawnin first set an la.

Second set-ah Bungkawn an fal a, set hnihna pawh an la awlsam. Set thumnaah Kanan rawn ṭang leh mah se Bungkawn an dingchang a, team anga an ṭhat rualna a a lang a; MeMe-i, F-i, Lawmkimi, Christina Lalmuankimi Sailo, RK Lalfakmawii leh PC Lalrinpuii te zinga mimal lawmman dawng mah se ṭha bik tih tur an awm lo a, champion phu ber an champion.

Engtin zel?
Bungkawn coach C. Lalremsiama chuan, "Kan hruaituten champion an duh a, kan mamawh zawng zawng min tihsak vek a, an chungah kan lawm hle a ni," tiin Vanglaini a hrilh a, Rema hian 2012-a Bungkawn champion ṭumin a enkawl tawh bawk a ni.

Bungkawn hi final vawi sarih an luh tawhah vawi ruk an champion thei a, amaherawhchu champion ngun ber erawh vawi 15 final lut tawha vawi 7 champion Kanan an ni thung.

Tun ṭum CYMA Volleyball hi vawi 21 ni mah se kum 1989 khan hmeichhe inelna a awm loh avangin tun ṭum hi hmeichhia bika a vawi 20-na a ni.