Vawiin tlai dar 2:00-ah MHIP Football final Kolasib Town Vs Champhai Sub. Hqrs

MFA leh MHIP buatsaih GIG Motors Inter Branch MHIP Football Tournament champion chu vawiin hian a hriat dawn. Tlai dar 2:00-ah Kolasib Town leh Champhai Sub. Hqrs ten Lammualah final an khel ang.

Inrinni khan semifinal khelh a ni a, Kolasib hian ITI Veng 5-0 in an sawp a, Champhai lamin Zemabawk North 9-0 in an sawp ve bawk.

Team ṭha pali zingah ṭha fal pahnih an awm leh a, semifinal-a goal nga leh a aia tam khung thei team inhmachhawn tur hi a hmuhnawm dawn.

Goal nga
Semifinal hmasa zawkah goal la chhuah lo pahnih ITI Veng leh Kolasib te an inkhel a; Vairengte, Hualngohmun leh Armed Veng paltlang zawh loh ITI Veng tlarhnung chu Kolasib-in minute ngana lekah Lalduhawmi hmangin an su hawng nghal.

ITI Veng tlarhnung a pawp zui a, Kolasib tan Lalnun-tluangi'n hattrick a siam bakah Lalrinchhani'n goal khat a khung belh a, 5-0 in an chak.

Goal kua
Champhai Sub Hqrs-in team ṭha an ni tih an lantir tawh a, player ṭha an kawl hnem bawk avangin champion rinkai an ni a. Semifinal-ah team ṭha danglamna a lang a, Champhai-in 9-0 zetin Zemabawk North an sawp.

Champhai tan Lal-hmangaihzuali'n goal li a khung a, Lalhlupuii Varte leh Lalchhanhimi ten goal hnih ve ve an khung a, Lalram-nghahmawii'n goal khat a khung bawk a ni.

Final chu
Kolasib hian final thleng turin Lungdai (4-0), Tuikual North (4-0), Ramthar Veng (3-0), Phulpui (4-0) leh ITI Veng (5-0) te an hmachhawnin an sawp vek a, goal 20 khungin goal an chhuah lo.

Player pathum Lalrinchhani (8 goals), Lalduhawmi (6) leh Lalnuntluangi (6) te an langsar a, Kolasib goal 20 hi heng player pathum te thun vek hi a ni. Duhawmi'n Ramthar an hneh ṭuma a goal a khung lo tih loh chu Kolasib trio hian match tinah goal an khung vek.

Kolasib ṭha mah se an khelh dan aṭanga thlirin Champhai chu la ṭha zawk cheu tura ngaih an ni. Champhai han final lut turin College Veng (2-1), Kanan (11-0), Thingsulthliah Block (2-0) leh Zemabawk North (9-0) te an hneh a, match li chauh an khel chungin goal 24 an khung a, goal khat chiah an chhuah.

Kolasib-in champion an duh chuan Champhai tana goal 10 khungtu Lalhmangaihzuali, goal ruk khungtu Lalchhanhimi leh Lalhlupuii (3 goals) te ven ṭhat a ṭul ang.