Neuer-a'n Germany chhan zo lo

FIFA World Cup champion lai Germany chuan Inrinni zan khan friendly match-ah Austria 2-1 in an hneh lo.

Worthersee Stadion-ah mikhualin Mesut Ozil hmangin minute 11-na lekah hma an hruai a, amaherawhchu second half-ah Martin Hinteregger leh Alessandro Schopf te hmangin Austria-in an lehthal.

DieMannschaft tan Manuel Neuer-a'n thla riat chhung inhliam vanga a inlan loh hnuah captain armband hrengin a rawn let a. Goal hnih a chhuah danah Neuer-a sawisel tur a awm lo a, ni 259 hnuah Bayern Munich keeper hi ram tan a rawn inlan leh a ni.

Germany coach Joachim Low chuan, "Hun rei tak a chawlh hnuah Manuel a rawn let a, a khel ṭha hle," tiin a fak a, an khelh danah erawh a lawm lo.

Low chuan, "First half kan khel ṭha a, second half-ah erawh kan khel ṭha lo. Kan tihsual vanga buai a ni a, insiamṭhatna tur tam tak a awm a ni," tiin an khelhdan chungchang a sawi.

World Cup khel pha lo Austria hian October 1986 hnuah Germany an hneh leh chauh. Joachim Low hian Jerome Boateng, Mats Hummels, Thomas Muller leh Toni Kroos te a chhawr lo a, June 8-a Saudi Arabia an khelh hunah insiamtṭhat ngei an tum ang.