Sunil Chhetri 3; India 5; Chinese Taipei 0

Intercontinental Cup match hmasa berah Sunil Chhetri a ropui nghal. India captain hian 5-0 a Chinese Taipei an hnehna inkhelah hattrick a siam a, kum 33-ah pawh India tan innghahna tlak a la ni reng.

Jeje Lalpekhlua'n goal khung lo mah se Mizo tlangval khelh ṭhatna hmuh hmaih theih a ni lo a, Chhetri goal thum zinga goal hnih hi Jeje-a siam sak a ni. Lalruatthara chu minute 80-naah luhtir a ni a, Jerry Lalrinzuala leh Laldanmawia Ralte ten bench lamah hun an hmang tluan thung.

Kenya leh New Zealand inkhelah rin loh zawk Kenya-in 2-1 in hnehna an chang. Zanin dar 8:00-ah Kenya hian inelna thlengtu India an hmachhawn leh ang.

Chhetri & Jeje
Indian legend Bhaichung Bhutia-a'n, "Chhetri leh Jeje inkawp hi India tan a ṭha ber," tiin a lo sawi daih tawh a, Sikkimese Sniper thusawi dikna tihlanin a awm chhunzawm zel.

India-in minute 14-na lekah Chhetri hmangin goal hmahruai an khung a, Jeje ke aṭanga chhuak a ni. Hnahthial tlangval hian Chinese Taipei player mawi zeta a bum hnuah Chhetri-a tan ṭha zetin a siam sak a, Bengaluru striker-in a hlah lo.

Minute 34-na a ni a, Jeje leh Chhetri bawk an lang nawn. Jeje leh Chennaiyin tana a khelhpui Anirudh Thapa ten mawi zeta ball an inpek kual hnuah Mizo tlangval hian Chhetri tan bawk a siamsak a, India-in an goal hnihna an khung.

Goal a sur
India-in first half-ah goal thum khung thei an ni a, mahse Chhetri-a'n a goal hnihna a khung hmain Jeje-a siamsak vek chu a khung lo. Chawlhlawk hman a nih hnuah India-in goal an sur tir a, Chinese Taipei player an hawihai.

Udanta Singh-a'n ṭha zeta ball a lakluh hnuah India goal thumna a khung a, a mimal thawhrah a ni. Kum 20 mi lek Thapa-a'n India tana a chance ṭha neihah a theihna a pholan chhunzawm a, minute 62-naa Chhetri hattrick siamna chu a ke aṭanga chhuak a ni.

Hun tawp nan minute 12 chauh a awm tawh tihah Pronay Halder a inlar ve leh thung a, FC Goa midfielder hian mawi zetin a pet lut–dan theih a ni lo.

Messi hnaihtu Chhetri!
India tan Chhetri-a'n match 99 a khelhah goal 59 a khung ta a, ram tana la khel zinga international goal khung tam lama a tluk loh chu Cristiano Ronaldo (81 goals) leh Lionel Messi (64) te chauh an ni tawh.

Blue Tigers tan match khata goal 0.60 zel ang khungtu Chhetri hian zanina Kenya an hmachhawn hunah India tan a match 100-na a khel dawn a, Chhetri chuan, "Min sawisel ula, min nuih rawh u. Mahse, kan inkhel rawn en turin ka sawm che u a ni," tiin Indian football fans a sawm.

India cricket captain Virat Kohli meuh pawh a inrawlh a, Kohli chuan, "Ka ṭhianṭha tak Chhetri a thusawi hi lo ngaithla ula, Indian football team inkhel en turin ka ngen che u a ni," a ti ve bawk.

Khelh dan danglam
Stephen Constantine hnuaia India team-in sawisel an hlawh ṭhin a, long ball chu an khelh dan tlangpui a ni. Zirtawpni zanah erawh passing game hmuhnawm hmuh tur a awm a, 4-2-3-1 formation hmangin India an hmuhnawm hle.

India coach Constantine chuan, "Tun hnaiah kan khel ṭha ṭhin a, vawiinah kha chuan a nih dan turin engkim a thleng a ni. Kan match hnuhnung pahnih ai khan kan ṭha leh tawh zawk a ni," a ti.

Chinese Taipei coach Gary White chuan, "Sunil Chhetri hi senior player nih dan tur sawifiah nana ṭha tak a ni a, a hnen aṭang hian ka naute an inzir ang," tiin India captain a fak.

Singh a zai rei lo!
Kenya leh New Zealand inkhelah All Whites-in goal an khung hmasa zawk a, Sarpreet Singh chuan mawi zetin a khung. Kum 19 mi, India chhul chhuak Sarpreet hi A League club Wellington Phoenix tana khel lai a ni.

Harambe Stars an ngawi rei lo. Miheso Cliffton chuan free kick hmangin mawi zetin a pet lut a, kum 18 mi Ovella Ochieng chuan chakna goal a khung bawk–rin loh zawk an chak.

Kenya coach Sebastien Migne chuan, "Hnehna kan chan avangin ka lawm a, ka player-te tan tun hi inzirna ṭha tak a ni," tiin a sawi.