Nigeria lakah England khel ṭha

World Cup khel tura inbuatsaih mek England chuan Inrinni zan khan Nigeria chu friendly match an khelhpui a, 2-1 in hnehna an chang.

Three Lions tan Gary Cahill leh Harry Kane ten goal khat ve ve an khung a, Nigeria tan Alex Iwobi chuan goal khat a khung ve bawk. England laka beiseina sang tak neitute tan inkhel en nuam tak a ni ngei ang a, Nigeria erawh last 16 luh inbeisei tur chuan an insiamṭhat hle a ṭul ang.

Chelsea defender Cahill-a'n World Cup-ah England tana inkhel bul ṭan a phu tih pholangin minute sarihna lekah goal hmahruai a tauh lut a, tlarhnungah a ding nghet hle bawk.

Three Lions captain tura ruat Kane-a'n hruaitu ṭha a nihzia a pholang a, England goal hnihna a khung kha ram tana a match hnuhnung pasariha goal riat a khungna chiah a ni. Tluk der vangin Raheem Sterling chu yellow card pek ni mah se Manchester City forward a taima a, a tlan tam a, a khel ṭha takzet.

Southgate tana hmuh nuam tur chu tun hnaia ram tana beisei phak lo Dele Alli khel ṭha kha a ni a, a elpui bera ngaih Jesse Lingard nen kheldunin an khel ṭha takzet - second half-a luhtir Ruben Loftus-Cheek a khel ṭha bawk a, Champions League final khelh chauh vanga chawl hahdam Liverpool captain Jordan Henderson an la nei cheu bawk.

England manager Gareth Southgate chuan, "Kan khelh danah ka lawm a, ka nauten mahni hmasial lo takin an khel a, tlarhnung kan phui ṭha em em bawk," tiin a sawi.

Three Lions hian Ningani zanah Costa Rica nen friendly match an khel leh dawn a, June 18-ah World Cup-a an match hmasa ber chu England nen an khel ang.