Serena leh Sharapova inhmachhawn dawn

French Open hmeichhe singles champion tura rinkai Maria Sharapova leh Serena Williams te chu last 16-ah an intawng dawn, player ropui pahnihte hi vawiin tlai dar 2:30 hian an inkhel dawn. Inkhel ṭan hun hi Paris-a khaw awmdan a zirin tihdanglam theih a ni thung.

Inrinni zan Roland Garros, Paris-a inkhelah Serena hian seeded palina Julia Gorges chu 6-3, 6-4 in a hneh a, Russian nula Sharapova pawhin seeded parukna Karolina Pliskova chu darkar khat pawh tling loah 6-2, 6-1 in a sawp ve bawk.

Player ropui pahnihte intawn tawhnaah Serena a chungnung hle a, vawi 18 ngawt hnehna a chang thei. 2004 erawh kha chuan Sharapova hian vawi hnih hnehna a chang ve thung. An intawn hnuhnung ber chu 2016 Australian Open kha niin American star hi straight set in a chak a ni.

World number 1 hlui Sharapova hian 2017 khan ama chanchin a ziahna bu 'Unstoppable: My Life So Far' ah chuan, "Serena nen Wimbledon kan khelh ṭum khan rinkai ka ni lo a, kum naupangte ni chunga ka hneh avang khan min ngei hian ka ring ṭhin," tiin a ziak.

Grand Slam vawi 23 champion tawh Serena chuan, "Player tam tak hi an chak loh hnuah an ṭap ka hmu fo, kei pawh anmahni ang thoin ka awm ṭhin. Ka chak lo a nih chuan ka lungngaiin hrehawm ka ti thei hle," tiin chak tuma tennis khel a nih thu a sawi.

French open bikah Serena hian nomawi vawi thum a chawi tawh a, a khingpui tur Sharapova hi vawi hnih a champion tawh thung. Fa neih hnua rawn kir leh thla 15 hrem tuar tawh pahnih an nih avangin seeding-ah an sang lo, mahse an theihna leh thiamna en chuan player dangte tana hmachhawn chakawm loh tak an ni.

Inkhel dang
Kartawp hmeichhe singles inkhel dangah Wimbledon vawi hnih champion tawh Petra Kvitova chu last 16 lut phak loin a tla a, world number 1 leh seeded pakhatna ni bawk Simona Halep erawh hma lam panin a kal zel.

Seeded pariatna Kvitova hian French Open inbuatsaihna pakhat Madrid Open nomawi a chawi avangin tun

ṭumah hian rinkai zingah a tel phak a, mahse inkhel inhnehtawk takah Anett Kontaveit chu 7-6 (8-6), 7-6 (7-4) in a hneh lo.

Final vawi hnih a khelh tawhna hmunah Halep a che buai duh lo. Romanian nula hian German nula Andrea Petkovic chu 7-5, 6-0 in a hneh a, 2016 Roland Garros champion Garbine Muguruza pawhin darkar khat leh minute thum chhung lekin Sam Stosur 6-0, 6-2 in a sawp bawk.

Elina Svitolina chu Mihaela Buzarnescu lakah 6-3, 7-5 in a chak lo. Seeded palina Svitolina hi kumin French Open khelh laiah hmeichhe singles seeded chang sang zinga tla hmasa ber a ni. Australian Open champion Caroline Wozniacki chuan last 16 lut turin khawtual nula Pauline Parmentier chu 6-0, 6-3 in a lo sawp ve thung a ni.