Hmeichhe football-ah Champhai an champion
MFA leh MHIP buatsaih GIG Motors Inter Branch MHIP Football Tournament-ah Champhai Sub. Hqrs an champion.
Nimin tlai khan Lammualah final khelh a ni a, Kolasib Town-in ṭum hnih hma hruai mah se Champhaiin an sut ve ve a, hun pangngaiah 2-2 in an inhnehtawk. Extra time khelh a ni a, Champhaiin goal hnih khung belh lehin 4-2 in hnehna an chang.
Final hmuhnawm
Team ṭha pahnihin final an lut a, ṭan phat aṭangin an inhnehtawk nghal. Kolasibin an thiampuinu Lalnuntluangi hmangin minute 12-naah hma an hruai a, box chhung chhak lam aṭangin a volley goal a, goal mawi a tling pha.
Champhaiin Kolasib tana hlauhawm ber Lalnuntluangi an veng a, hei hian inkhelah nghawng a nei a, an che ṭha sawt. Second half minute sarihnaah Lalchhanhimi ball vawrh chu Lalhmangaihzuali'n chest thlain a vir pui a, hla deuh tak aṭangin a ke vei lamin keeper Helen Ramengmawii a pet khum a, Kolasib keeper dem theih a ni lo - a ṭha em a ni.
Kolasib striker Lalnuntluangi'n amah an ven ulukna chu remchangah hmangin ball pet tur anga a awm hnuah vengtu nei lo Lalrinchhani pe thlain ani hian minute 53-naah hmahruaina a khung nawn.
Champhai an beidawng duh lo a, right back Lalmuanchhungi ball vawrhluh chu keeper Helen-i'n man perin Hunlawmawmi'n a tlan chakna hmang ṭangkaiin minute nga chiah a awm tawh tihin siphurh sutna goal a khung.
Extra time-ah Champhai
Hunlawmawmi goal hmangin Champhaiin extra time an thleng a, hun lawmawm an tawng zui. Hun pek belh minute hnihna lekah ding lam aṭangin Lalhriatpuii'n chak taka ball lalutin a cross ball chu Lalchhanhimi'n goal-ah a chantir.
Minute 79-na aṭangin Lalhlupuii Varte-in box pawn aṭangin Champhai chak nemnghehna goal a khung. Kolasib-in final hmain goal an chhuah lo a, nomawi inchuhna inkhelah pawh best defender-a thlan Flora Lalrinmawii che ṭha mah se a vanduai zawkah an ṭang.
Champhai an ṭha rual a, veteran defender Lalrinmawii Varte-in tlarhnung a ho hneh a. Hunlawmawmi'n goal a khung bakah Lalnuntluangi a dah ṭha thei chu result lawmawm an neih theih chhanah a ngaih theih.
An ṭha rual - Coach
Champhai hi Bethlehem-ah an innghat a, football tui veng hmuna an thleng hi an vanneih phah. FC Bethlehem lamin an training-na tur ball leh ṭul dang an an hmantir a, Bethlehem tlangval Jonathan Lalchhanhima'n team hi a ho nghal bawk.
Champhai coach Jona chuan, "Kan team-ah chuan ṭha bik an awm lo a, an ṭhat rual vangin kan champion. Chutihrualin final thlir chuan kan vannei tel a, team thawhhona ṭhat vang tiin a sawi theih bawk," tiin Vanglaini a hrilh.
Lawmman
Champion : Champhai Sub Hqrs, Rs 50,000 & Trophy
Runner Up : Kolasib Town Rs 30,000 & Trophy
Semifinalist : ITI & Zemabawk North Rs15,000/-
Quarterfinalist : Phulpui, Salem, Armed Veng Rs 10,000/-
& Thingsulthliah Block
Fair play : Champhai Sub Hqrs Rs15,000 & Trophy
Best Goalkeeper : Baby Zothankhumi, ITI
Best Defender : Flora Lalrinmawii, Kolasib
Best Midfielder : Lalhumhimi, Zemabawk North
Best Forward : Lalhmangaihzuali, Champhai
Mimal lawmman hian Rs 1,000 leh Trophy a keng tel