Zanin dar 8:00-ah CYMA Volleyball Mipa Final Zawlnuam Vs Muanna Veng

LBS Suzuki 21st Inter Branch YMA Volleyball Tournament-ah zanin hian mipa final khelh a ni dawn a, zan dar 8:00-ah Zawlnuam leh Muanna Veng ten R. Dengṭhuama Hall, Mualpuiah nomawi an inchuh ang.

Muanna Veng hi volleyball vangin an lar a, amaherawhchu CYMA Volleyball-ah vawi khat chiah final la lutin kum 2016 khan champion ngun ber leh vawi thum champion tawh Maubawk lakah an tlawm. Zawlnuam tan tun ṭum hi CYMA buatsaih volleyball inelnaa an vawi khat telna a ni a, final lut nghalin zanin hian champion thar an awm dawn.

Muanna Veng hian Pro Volleyball-ah club an nei a, TNT chu team ṭha ber zinga mi an ni a. Final an luh theihna kawngah pawh Pro Volleyball-a an player pawimawh Sedrak-a, Lallungmuana leh Vanlalchhantluanga te a ṭangkai hle.

Zawlnuam lamin Laltlanchhuaha chhawr thei lo mah se Lalramnunfela an ṭhat pui a, Pro Volleyball hnuhnung bera best player hian amah vawrh sangtu TNT awmna Muanna Veng a hmachhawn dawn.

Zanin hian Muanna Veng hi champion tura rinkai an ni a, amaherawhchu Ramnunfela'n thlawptu a neih ṭhat phawt chuan Zawlnuam mipuiin chenna ngai loh ramah an cheng thei ang.

Finalist pahnih hian ṭantu an nei ṭha ve ve a, vawi tam inelna hmachhawn tawh Muanna Vengin au dan an ngah a, boruak an siam thiam a, final an ti hmuhnawm sawt dawn. Zawlnuam lam tan an tawnchin apiang thil thar a ni zel a, Mizoram pum huapa an champion theihna hun ṭhaah hian court chhungah chak zawk an duh ang chiahin mipui lamah pawh ṭha zawk ni an ni duh ang.

R. Dengṭhuama Hall kawt chei ṭhat chhoh zel a nih avangin organiser, player leh official-te chiah compound chhungah tlanluh theih a ni ang a, two wheeler erawh a thleng hmasa tan dahna a awm thei ang. Lirthei dang chu RG Stadium leh a kalkawng kawngpui zau laia dah tur a ni.

Kum Champion Pahnihna
1989 Bungzung Serchhip
1990 Champhai Dawrpui Vengthar
1991 Dawrpui Vengthar Bungkawn
1993 Bungzung Dawrpui Vengthar
1999 Dawrpui Vengthar Bungkawn
2001 Chanmari West Ramhlun North
2004 Champhai Vengthlang Hunthar
2005 Hunthar Champhai Vengthlang
2006 Ramhlun North Hunthar
2007 Maubawk Hunthar
2009 Hunthar Tuikual North
2012 Kulikawn Hunthar
2014 Maubawk Chanmari West
2016 Maubawk Muanna Veng