Lorenzo hun a thleng ve ta

Jorge Lorenzo chuan Ducati bike a khalh hnua a vawi khat nan MotoGP intlansiakah hneh­na a chang ve ta. Pathianni zana tlan zawh tak Italian Grand Prix-ah Ducati rider hian hneh­na a chang a, champion lai leh rider championship hma­hruaitu Marc Marquez erawh a chetsual avangin a dinhmun a sawh nghet thei lo.

Mugello Circuit-ah mipui an pungkhawm hnem a, entu mipui ṭhutna 50,000 an luahkhat viau. Italy rama an tlankawng hmingthang tak Mugello Circuit hi 5.245 km a thui a ni a, kawng kawi 14 awmin a ngil thui lai ber chu 1.141 km a ni.

A chak ber
Intlansiak tir aṭangin rinkai pathum Lorenzo bakah pole position aṭanga bul ṭantu Valentino Rossi leh Marquez te an inum tawn a, lap hmasa ber aṭanga parukna thleng chuan an inum tawk hle.

Honda rider Marquez-a'n a hma bera tlan a tum a, lap 23 an tlan tur zinga lap thumnaah Rossi chu a tlan pel, a hma a awm Lorenzo chu tlan pelh tumin na takin a nawr zui bawk.

Amaherawhchu, lap nganaah Marquez a chefuh tawk lo a, a dinhmun a tlahniam nghal duai. A hnunga awm Marquez a chetsual takah chuan Lorenzo dinhmun a ṭha chhunzawm a, 0.7 seconds in hma a hruai.

Intlansiak a rei tual tual a, Lorenzo a chak tawlh tawlh. Lap 13 an tlan meuh chuan 1.5 second in hma a hruai fal tawh a, MotoGP champion vawi thum ni tawh hian 2016 Valencia Grand Prix hnua a vawi khat nana hnehna chang turin harsatna a tawk lo - bike intlansiakna sang berah hian vawi 45 a chakna chiah a ni nghal bawk.

Kum 31 mi Lonrenzo hnung­ah hian a teammate Andrea Dovizioso a thleng a, an inthlauh­na chu 6.370 seconds a ni. Do­vizioso a hnunga thleng Rossi aiin 0.259s chiahin a hmasa, tun season chhunga beisei anga la tlan ṭha tawk lo Ducati chuan pakhat­na leh pahnihna an hauh thei a ni.

An lawm
Rider championship lama 10-na Lorenzo chuan, "Helai hmuna Ducati nena hnehna chan chu a hlu danglam bik hle," tiin a sawi. Lorenzo hi a vanduai hle a, season tir lam khan Qatar leh Spain-ah te a tlan tluan thei lo a ni.

Kum 39 mi Rossi pawhin an rama intlansiak chung­­chang sawiin, "In­tlansiak harsa tak a ni, beiseina kan neih vang erawh chuan a nuam hle thung. A bik takin a hma lama ka tlan dawnin harsatna ka nei

ṭhin, a tawpah thutlukna ka siam fuhin ka hria, podium ka lawn phak avangin ka lawm," a ti.

Tun season intlan­siak vawi ruk an hma­chhawn tawh zinga vawi thum hnehna chang thei Marquez erawh 16-naah a thleng hram a, Spanish rider hian point 95 hmu tawhin hma a hruai chhun­zawm zel thung. A hnungah hian point 72 nei tawh Rossi a awm.

Kuminah hian intlansiak vawi 19 a awm dawn a, paruk an tlan tawh. June 15 leh 29 hian Spanish Grand Prix leh Spanish Grand Prix an tlan leh ang. July hian intlansiak pakhat chiah a awm dawn a, August thlaah erawh vawi thum an tlan thung ang.