Set nga khel tura tling tawk Zverev

Rafael Nadal-a'n 'Tennis player ṭha hriat nan chuan set nga khelh a ṭha ber' tiin a lo sawi tawh a, world number 1 Nadal tehna aṭang chuan Alexander Zverev chu khawvel player ṭha berte zinga mi a ni chho mek. German rawlthar duhawm hian Pathianni zan khan Karen Khachanov hnehin French Open quarterfinal a lut.

Roland Garros, Paris-ah kum 21 mi Zverev hian darkar thum leh minute 29 chhungin 4-6, 7-6 (7-4), 2-6, 6-3, 6-3 in hnehna a chang a, seeded pahnihna Zverev tan Grand Slam quarterfinal hmasa ber a ni dawn–semifinal lut tur chuan Dominic Thiem a paltlang leh a ngai dawn a ni.

World number 3 Zverev-a'n a match hmasa berah straight set-in hnehna a chang tih mai loh chu awlsam taka chak a nei thei rih lo. Chak lo thei dinhmuna a din hnuah a zawnin player pathum a lehthal ta chiah a, heng inkhelah te hian set nga an khel vek. Grand Slam hi inelna dangte angin kar khat chhunga zawh a ni lo a, tun kar an la khelh dawn avangin a hmabak a hautak chho dawn hle.

Zverev chuan, "2-1 a nih hnuah ka chak leh thei a, darkar thum chuan kan inkhelh hnua hnehna ka chan leh theih ṭhin chhan hi inbuatsaihna ka neih ṭhat vang a ni. Ka kum a la naupang a, chutih rualin a ṭha dang an rawn chhuah reng avangin inelna a hautak chho zel," a ti. Roger Federer a inlan loh avangin Zverev hi Nadal chhaih buai thei tura ngaih langsar a ni.

Seeded pasarihna Thiem pawhin Japanese star Kei Nishikori chu 6-2, 6-0, 5-7, 6-4 in a lo hneh ve bawk. Thiem-a'n tun hnai season hnih chhung chu Roland Garros-ah hian semifinal a thleng thei a, ATP titles 10 a lak tawh zinga pariat zet chu clay court-ah a nih avangin Austrian tlangval hi Zverev tan awlsam taka paltlang theih ngawt chu a ni dawn lo.

Clay court-a Nadal hneh thei hnuhnung ber Thiem chuan, "Zverev nen kan inkhelh tur hi a awlsam dawn lo. Quarterfinal a vawi khat luhna a ni a, round sang zawk thlen ngei a duh ang. Mahse, kei pawhin a sang zawk nih ka duh a, tawnhriat ka nei hnem zawk bawk," tiin a sawi.

Djokovic a tlang
Novak Djokovic pawhin champion rinkai zinga mi a nihna a pholang zel. Serbian tlangval hian Fernando Verdasco chu 6-3, 6-4, 6-2 in a hneh a, Roland Garros-ah hian a zawnin season 12 chu quarterfinal a lut tawh–Open Era chinah ani aia record nei ṭha an awm lo.

Grand Slam vawi 12 champion tawh Djokovic-a'n Marco Cecchinato a hmachhawn leh dawn. World number 59 Cecchinato hian rinkai lo zawk ni chungin seeded pariatna David Goffin chu a lo hneh ve bawk a ni.

2016 French Open champion Djokovic chuan, "Tun hnai thla 15 ka hun hman dan ngaihtuah chuan Grand Slam quarterfinal thlen hi a lawmawm hle. Inelna lianah ka khel ṭha chho leh mek a, helai hmuna tawp mai hi ka duh lo," tiin semifinal thlen ngei a tum hle. Djokovic hian hnehna a chang a nih chuan Alexander Zverev leh Dominic Thiem te inkhela chak zawk a hmachhawn leh dawn.