Cavs tan Curry a thiam mah mah

Stephen Curry-a'n NBA Finals record siam a three point vawi kua zet a vawm luh niah Golden State Warriors chuan Cleveland Cavaliers chu 122-103 in an hneh a, Steve Kerr-a naute hian best-of-seven series-ah 2-0 in hma an hruai mek–Ningani zing dar 6:30 hian game 3 khelh a ni ang.

Thawhṭan zing Oracle Arena-a inkhelah a tir aṭangin Golden State an chungnung a, guard Curry-a'n point 33 a neih zinga point 16 chu fourth quarter chhunga a neih a ni. American star hian Boston Celtics star hlui Ray Allen-a record (2010) khumin NBA Finals inkhel pakhat bika three point vawm lut hnem ber a ni ta.

Champion lai GSW hian nomawi an humhim a nih chuan tun hnai season li chhunga vawi thum an champion-na tur a ni dawn a, chutih rualin game 3 an khelhna tur hi Quicken Loans Arena a nih tawh avangin an mahni mual ang ngawt chuan a awlsam tawh lo ang.

Cavaliers thiampuipa LeBron James-a'n game 1-ah point 51 zet score mah se a team a chak pui zo lo a, nimin zingah point 29 nei leh bawk mah se a ṭhiante thlawpna a dawng ṭha chuang lo. Game 1-a thutlukna siam fuh lo tu JR Smith-a'n court chhunga minute 31 hun a hman chhungin point nga bak a nei lo a, minute 20 khel tling zinga point nei tlem ber a ni!