Anfield-ah Neymar a mawi

Thla thum chuang zet hliam vangin a chawl a, World Cup-a khelh theih loh hial an hlau hman. Mahse, Neymar-a'n Pathianni zan khan khawvela footballer manto ber a nih chhan a pholang a, a inhliam hnua a match hmasa berah Brazil tan goal a khung lehnghal.

Anfield-ah Brazil leh Croatia ten friendly match an khel a, Neymar hi inlan tur pawha beisei a ni chiah lo. Mahse, Paris Saint-Germain forward hi second half-ah luhtir a ni a, minute 69-naah goal 'cial khungin Roberto Firmino chuan goal khat dang a khung ve bawk.

Mi danglam Neymar
Anfield-ah Croatia-in team ṭha an ni tih an pholang a, second half-a Neymar luh hnuah erawh inkhel a danglam thung. Pound maktaduai 200 man forward hian Croatia defender a bum kual hnuah goal hmahruai a khung a, player special a nihzia hmuh turin a awm.

Roberto Firmino-a'n Gabriel Jesus aia thlan a nih tur chhan a pholang bawk a, minute 60-naa luhtir Liverpool forward hian a awm hmanga mawi zeta ball a lak thlak hnuah Croatia keeper Danijel Subasic a pet khum.

Brazil coach Tite chuan, "Rei tak a inhliam hnua a match hmasa ber a ni a, goal khung nghal turin ka beisei lo. Kha aia langsar lo zawk khan khel pawh ni se ka lawm tho ang," a ti a, Neymar a che ṭha nghal chu a coach meuh pawhin mak a ti.

Tite & Brazil
Brazil coach Tite-a'n defensive midfield pathum regular takin a chhawr ṭhin a, Croatia lakah pawh chutiang tho chu a ni. Brazilian coach hian South American coach dang ang lo takin tlarhnung a ngai pawimawh tel ṭhin a, chu chu Brazil chakna hnarah ngaih a ni.

Croatia lakah pawh Paulinho, Casemiro leh Fernandinho te inkhel bul a ṭantir vek a, a danglamna erawh goal nawr a pawimawh hunah luhtir tur a la ngah tho hi a ni–Fernandinho aiah Neymar a luhtir a, Jesus aiah Firmino a la luhtir thei bawk, Anfield-ah pawh he substitution hi inkhel danglamna a ni tih a lang.

Anfield-ah Croatia an khel chhe hran bik lo. Tawnhriat nei ngah Vedran Corluka, Ivan Rakatic leh Luka Modric karah player beiseiawm Ante Rebic, Marko Pjaca leh Andrej Kramaric te an nei a, World Cup-ah beiseina sang tak nen an feh chhuak thei ang.