Chhetri ropui zanah Jeje a nêp bik lo

India captain Sunil Chhetri chuan Thawhṭanni zan khan ram tana a match 100-na a khel a, goal hnih a khung bawk.

India mipui ngaihven inkhelah Jeje Lalpekhlua a awm mai mai bik lo. Mizo tlangval hian goal khat a khung ve bawk a, India-in Kenya chu 3-0 in an sawp.

Bhaichung Bhutia-a'n India tan match 104 khelin goal 40 a khung a, Sikkimese legend hnuah Sunil hi ram tana match 100 khel tling leh thei hmasa ber a ni a, goal khung lamah chuan a sang fal hle–Blue Tigers tan goal 61 a khung tawh.

India-in match hnih an khelh tawhah vawi hnih hnehna an chan avangin final an lut chiang a, final-a an hmachhawn tur erawh a la chiang lo.

Ngaihven hlawh
Sunil Chhetri-a'n inkhelh hmain football fan-te inkhel en tura sawmna video a siam a, hei hi twitter lamah a pholang.

Indian striker sawmnain mi tam tak thinlung a hneh a, India cricket captain Virat Kohli, cricket legend Sachin Tendulkar leh tennis star Sania Mirza te meuh pawhin Chhetri thlawpna thu an au chhuahpui.

Infiamna huang mai ni lo Bollywood star-te thlengin Chhetri thlawpna thu an aupui a, a chhanna chu nizan inkhelh hmaa ticket hralh zawh vek a ni! Thawklehkhatah inkhel ngaihven hlawh lo tak kha inkhel ngaihven hlawh tak a ni thar a, India rama media lian zingah Chhetri chanchin ziak lo an awm lo.

Mumbai Football Arena leng lo mipui an pungkhawm a, India tana a match 100-na khel tur Chhetri chawimawina thu nen stadium an mawi a, 'India, India' tiin mipui an au rual.

Captain, Leader, Legend
Chhetri sawmnain mipui a hneh avangin stadium-ah mipui an khat a, first half chhung erawhin an duh an hmu lo. Ruah a sur nasat avangin Indian player-ten passing game khelh an harsat a, minute 45 chhunga hlauhawm zawk chu Kenya an ni.

Second half-a ni a, mipuiten an duh an hmu ta. Inkhel en tura football fans sang rual sawmtu Chhetri-a'n a sawmna ngai pawimawhtute hlim taka auna hun pe loa hawtir a tum lo. Minute 68-naah penalty a hlawh chhuak a, amah vekin a pet goal.

Minute thum chiah a liam hman a, mipuiin auna tur an nei lehnghal. Kenya defender ball dan per chu Jeje-a ke bulah ber kher a tla a, 'The Mizo Sniper' tia hminglem an pek hian Kenya goal-ah kawh zetin a thlawh lut.

Mumbai Football Arena-a pungkhawmte hlim taka lamin an zai a, an duh an hmu tawh. Chhetri erawhin a la duhtawk lo. Bengaluru striker hian hun pek belhah a 'class' a pholang a, mawi zeta Kenya keeper chip khumin India goal thumna a khung, 3-0 in an chak.

In tan - kan nunna!
Chhetri video vangin inkhel entu an ṭhahnem a, Chhetri-a'n goal hnihin lawmthu a sawi let. Kum 33 mi striker-in inkhelh zawhah pawh inkhel entute a theihnghilh lo a, lawmthu a sawi.

AIFF Player of the Year-a vawi li thlan lo ni tawh striker chuan, "Ram tana kan inkhelh apiangin khatianga ṭawiawmna ṭha kha kan hmu a nih chuan kan nunna zawng zawng nen in tan kan khel zel ang.

"India, zanin kan inkhel hian danglamna em em a neih chu kan vaia kan thawkho hi a ni. A hmuna inkhel entu leh TV lama min lo thlirtute pawh, in zavaia chungah ka lawm a ni," tiin twitter lamah a ziak.

Goal khat khungtu Jeje chuan, "Kan chakna hi Chhetri tan kan hlan a, ka goal khung pawh kha a tan ka hlan a ni," tiin ram tana a match 100-na kheltu Chhetri a lawmpui thu a sawi.

Hmabak chu
Nizan khan New Zealand leh Chinese Taipei an inkhel a, he thu buatsaih a nih lai hian an result kan hre hman lo. Team pahnih hi an match hmasaa chak lo ve ve tawh an ni a, nizana chak lo zawk hi final aṭanga thaibo theih an ni tawh ang.

India hian Nilaini zanah an league match hnuhnung ber an khel dawn a, All Whites an hmachhawn dawn. Match hmasa bera mipui 2000 chuang awrhin inkhel an en laiin Chhetri-a video-in hna a thawh chhunzawm zel bawk.

Ningani zana team pahnih inhmachhawn tur ticket hi hralh zawh vek a ni tawh a, Mumbai Football Arena khatin mipui an pungkhawm leh dawn tihna a ni.

Jeje tih loh Mizo zingah Lalruatthara chu match hmasa berah bench aṭanga luhtir a ni a, Kenya lakah erawh Hmunhmelṭha tlangval hi Jerry Lalrinzuala leh Laldanmawia Ralte te nen bench-ah an ṭhu tluan.