Italy leh Netherlands inhnehtawk

World Cup khel lo tur ram langsar pahnih Italy leh Netherlands te chu Thawhṭan zan khan friendly match-ah 1-1 in an inhnehtawk a, Dutch team tan Nathan Ake chuan ram tana a goal hmasa ber a khung.

Italy hian minute 67-naah substitute Simone Zaza hmangin goal hmahruai an khung a, mahse an hlim authawm pawh a reh hmain minute hnih hnu lawkah Domenico Criscito chu Ryan Babel a tih tluk avangin red card pek a ni.

Azzurri hian hnehna an chang mai dawn niin a lang a, mahse hun tawp nan minute hnih chauh a awm tawh tihin Bournemouth defender Ake chuan an si phurh sutna goal a khung.

Inkhel pumpui thlirin Italy chu chungnung zawk an ni. Torino forward Andrea Belotti goal khung chu offside vangin pawm a ni lo a, Criscito tauh luh ngei tur nia lang chu Ruud Vormer chuan line aṭangin a pet chhuak hman bawk.

Ram pahnih hian World Cup khel tura an tlin loh hnuah an coach an thlak ve ve. Netherlands hi Ronald Koeman chuan enkawlin match li a khelhpui tawh a, vawi khat chiah hnehna an la chang. Vawi hnih an khingpui an inhnehtawkpui a, vawi khat an tlawm thung.

Roberto Mancini enkawlna hnuaiah Italy-in match thum an khel tawh a, match hmasa berah Saudi Arabia 2-1 a hneh nghalin France erawh 3-1 in an ngam lo a, tunah Netherlands an inhnehtawkpui leh bawk.