Wozniacki zinkawng a tawp

French Open hmeichhe singles seeded pahnihna Caroline Wozniacki chu last 16 paltlang zo loin a tla. Thawhṭan zan inkhelah Australian Open champion Wozniacki hi Daria Kasatkina lakah 7-6 (7-5), 6-3 in a tlawm a ni.

Player pahnihte an inkhel tawk hle a, set hnuhnung zawkah 3-3 a nih hnuin kum 21 mi Kasatkina-i'n game thum a la zawn a, Roland Garros junior champion ni tawh hian a vawi khat nan Grand Slam quarterfinal a khel dawn, nizan khan Sloane Stephens nen an inkhel zui a, he thu buatsaih lai hian result kan hre hman lo.

Thawhṭanni zan inkhel tur dang Serena Williams chu hliam vangin a inhnukdawk a, a khingpui tur Maria Sharapova chuan inkhelh hah ngai loin quarterfinal a lut. Russian nula hian zaninah Wimbledon champion Garbine Muguruza a hmachhawn leh dawn a ni.

Kum 36 mi Serena hian fa a neih hnuah a vawi khat nan Grand Slam a khel a, singles mai duh tawk loin a unaunu Venus Williams nen doubles-ah an inlan kawp. Hei vang hian ni ruk chhungin match ruk a khelh a ngai a, a tihrawl na vangin a service kawngah harsatna a nei.

French Open champion hlui Muguruza hian darkar khat leh minute thum chhung lekin Sam Stosur chu 6-0, 6-2 in a hneh. Grand Slam vawi hnih champion tawh Muguruza a chak laiin Wimbledon vawi hnih champion tawh Petra Kvitova chu Anett Kontaveit lakah 7-6 (8-6), 7-6 (7-4) in a chak lo thung.

World number 1 Simona Halep pawhin seeded 16-na Elise Mertens chu 6-2, 6-1 in a hneh ve bawk. Romanian nula Halep hian zaninah Angelique Kerber a hmachhawn leh dawn a, German star Kerber hian champion tura rinkai ni phak Caroline Garcia chu 6-2, 6-3 in a hneh theih avangin Halep nena an inkhel hi a hmuhnawm ang.