Match 900 chak thei Nadal
French Open vawi 10 champion tawh Rafael Nadal chuan quarterfinal a lut leh tawh a, professional tennis a khelh hnuah match 900 zet hnehna a chang ta. Spanish tlangval hian semifinal lut tur chuan Diego Schwartzman a paltlang leh a ngai dawn a ni.
Thawhṭanni zan Roland Garros, Paris-a last 16 inkhelah Nadal bakah Schwartzman, Juan Martin del Potro leh Marin Cilic ten an khingpui hnehin quarterfinal an lut vek bawk. Nizan khan Dominic Thiem, Alexander Zverev, Noval Djokovic leh Marco Cecchinato ten match an nei a, he thu buatsaih lai hian result kan hre hman lo.
Match 900-na
Clay Court-a inkhel a nih tawh chinah chuan Nadal hi chak tura rinkai a ni nghal zel a, world number 1 hian a khingpui Maximilian Marterer lakah a service hmasa ber hloin 2-0 in hnufual mah se a tho chhuak leh nghal a, darkar hnih leh a chanve chhungin 6-3, 6-2, 7-6 (7-4) in a hneh. French Open 2018 khelh laiah Nadal hian set a la hloh lo a, a pumpuiah set 37 a la zawn tawh.
Kum 32 tling hlim Nadal hian nidang angin awlsam takin hnehna a chang mai bik lo, set hnihna tir lamah break point a hmuh a hmang ṭangkai thei a, set thumnaah erawh 3-1 a hniam zawk a nih hnuah tie break khelhpui lehin hnehna a chang tlang. Kum 22 mi Marterer tan French Open vawi khatna a ni a, seeded chang phak lo chungin thleng sang viau mah se Nadal lakah a ruh a la no hret.
Grand Slam vawi 16 champion tawh Nadal hian tennis inelna lian bikah hian match 234 hnehna a chang chiah a, American hranghlui Jimmy Connors record khumin major tournament bikah hnehna chang hnem pathumna a ni ta. Nadal chuan, "Rawlthar ang mai niin ka la inhria, chutihrualin kum 32 ka ni der tawh. Kawng thui tak chu ka lo zawh ve reng tawh a ni," a ti.
A lian leh te
Quarterfinal-a Nadal khingpui tur Diego Schwartzman chuan Kevin Anderson lakah 1-6, 2-6, 7-5, 7-6 (7-0), 6-2 in hnehna a lo chang ve bawk. 5ft leh 7 inch a sang Schwartzman chuan 6ft 8inch zeta sang Anderson nen an inkhel chu Bible-a inziak Davida leh Goliatha inbei ang mai a nih thu a sawi.
Argentine tlangval Schwartzman hian a vawi hnih nan Grand Slam huangah last 16 a lut chiah, Paris bikah hian a vawi khatna a ni. Tun season French Open bikah chuan mipa player tawi ber a ni a, a khingpui South African tlangval Anderson hi palian pahnihna a ni thung.
Kum 25 mi Schwartzman chuan, "Davida leh Goliatha te chanchin hi ka naupan laiin ka chhiar tawh a, Kevin te anga palian ka hmachhawn dawn hi chuan ka hre chhuak ṭhin. Player pumraw lian tak takte angin thahrui kan ngah lo a nih pawhin huaisenna kan neih miau chuan kan tan hnehna chan theih a ni tih hi ka hre reng ṭhin," a ti.
Inkhel dang
Last 16 inkhel dangah Juan Martin del Potro chuan John Isner chu 6-4, 6-4, 6-4 a hnehin quarterfinal a lut ve bawk. American tlangval Isner hi 6ft leh 10inch zeta sang a ni a, 2018 French Open khel player zinga sang ber niin, a hneh lo Del Potro ai hian 4inch in a sang zawk.
Argentine tlangval Del Potro hian amah ang thoa US Open champion tawh Marin Cilic a hmachhawn leh dawn. Seeded pathumna Cilic hian seeded 18-na Fabio Fognini chu 6-4, 6-1, 3-6, 6-7 (4-7), 6-3 in a lo hneh ve bawk a ni.
Kum 29 mi Cilic hi tun hmain Roland Garros-ah hian a thiam pariat zingah a la inhlangkai ngai lo. Player ṭha tak ni mah se clay court hi atan hmun duhthusam a ni bik lo a, a khingpui tur Del Potro nen hian an kum leh san zawng a inang a, major title an lak tawh zat a intluk bawk avangin an inkhel tawk hle ang.