World Cup khel tur Serbia chak lo

Serbia chuan Thawhṭanni zan khan World Cup inbuatsaih nan Russia kal lo tur Chile an hmachhawn a, 1-0 in an chak lo.

Chile hian hun tawp nan minute hnih chauh a awm tawh tihah Guillermo Maripan hmangin he inkhela goal awmchhun hi an khung a, Serbia tan chhanletna hun a awm tawh lo.

Thawhṭanni zan inkhelah hian Chile tan Manchester United striker hlui Angelo Henriquez chuan hnai set sawt aṭangin goal ruakah a khung lo a, Serbia tan Aleksandar Mitrovic chu penalty hlawh chhuak ngei tura ngaih a nih laiin Newcastle United striker hi a beisei penalty pek a ni bik lo.

World Cup khel lo tur Chile hian an player langsar Alexis Sanchez leh Arturo Vidal te chawlh hahdamtirin squad naupang zawk an inlan tir a, Serbia hian United midfielder Nemanja Matic leh Lazio midfielder Sergej Milinkovic-Savic chu bench-ah an dah ve bawk.

Serbia hi World Cup Group E-ah Brazil, Costa Rica leh Switzerland te nen an awmho a, Inrinni zan hian Bolivia nen friendly match an khel leh ang.