England number 1 tur Pickford?

Everton goalkeeper Jordan Pickford chu jersey number 1 pek a ni a, kum 24 mi si ban nghaktu hian England tan World Cup-ah goal a veng ngei dawn niin a lang.

Pickford hian kar hmasaa Nigeria nen international friendly match an khelhah Three Lions tana a vawi thum nan goal a veng ve chauh a, mahse World Cup-ah si ban a nghah tur thu erawh England manager Gareth Southgate chuan hriatthiam theih tak turin a sawi.

England boss Southgate chuan Nigeria nen an inkhelh zawhah khan, "Jordan kan thlan chhan hi chu kan hrethiam maiin ka ring. Nigeria-in min nawr tam lo mah se thutlukna a siam ran dan kha in hrethiam ang," tiin a keeper hi a lo fak tawh.

Stoke City keeper Jack Butland chuan number 13 a ha dawn a, Burnley keeper Nick Pope chuan number 23 a ha thung ang. England captain Harry Kane-a'n Tottenham Hotspur-a a hak ṭhin number 10 a ha dawn lo. He number hi Raheem Sterling chuan a ha dawn a, Kane hian number 9 a ha thung dawn.