Juventus leh Emre Can an inrem

Liverpool midfielder chuan Juventus zawm turin inremna a neihpui tawh niin khawthlang media te chuan an tarlang a, karlehah medical a nei ang.

Kum 24 mi midfielder hi June thla tawp rual hian Liverpool-a a contract a tawp tawh dawn a, Italian champion hian free transfer-in an lalut dawn a ni.

Khawthlang media te chuan Can hian Juventus-ah kum li cham turin contract a ziak niin an tarlang a, season khatah pound maktaduai li a hlawh dawn niin an sawi.

Juventus CEO Beppe Marotta chuan May khan Reds midfielder hi an lakluh hnaih thu a lo sawi tawh a, tunah chuan thu hi a takah a chang dawn ta niin a lang.

Germany World Cup squad-a koh loh Can hian 2014 khan Bayer Leverkusen aṭangin Liverpool hi pound maktaduai 9.75-in a zawm a, season li hun a hman chhungin match 166 a khelh sakah goal 14 a khung.