NBA Finals : Cavs tan chak ngei a ngai

Cleveland Cavaliers tan NBA champion ni turin hnehna chan a pawimawh tawh. Ningani zing dar 6:30 hian Golden State Warriors an mikhual dawn, LeBron James-a team hi best of seven series-ah 2-0 in an hniam zawk mek. Chutihrualin Quicken Loans Arena-ah a zawna an inkhelh dawn avangin an beiseina a la tawp bik lo.

Cavs forward Kevin Love chuan, "Kan chunga thil thleng mek hi kan hrechiang a, tun ṭumah chuan kan chak ngei a ngai," tiin a sawi tawh. Cleveland tan a dan pangngaiin James a pawimawh leh dawn a, amah thlawp turin Love leh JR Smith te an chetṭhat a ṭul tawh dawn hle a ni, an chesual leh a nih chuan thawh leh a harsa tawh ang.

Team pahnih player leh tun hnaia an khelh dan thlir chuan GSW hi rinkai zawk an ni. Mahse, Tyronn Lue naute hian 2016 NBA Finals-ah khan 3-1 ngawta an hnufual hnuah Steve Kerr leh a hote hi an lehthal thei a, 1947 aṭanga NBA Finals khelh a nih hnua comeback ropui bera ngaih a ni.

Tun ṭumah pawh hian Cleveland Cavaliers hi game hmasa pahnihah chak lo mah se an zam ngawt lo ang. Inlehthalna ropui an lantir

ṭuma an hmachhuan James a la awm miau a, American star hi a chet fuh ni chuan match khatah point 50 chuang score thei a ni.

Golden State lama ven ngun ngai bik chu Kevin Durant, Stephen Curry leh Klay Thompson te an ni a, an ṭhat rual em avangin inven sen a ni kher lo ang. Cavs tan three points vawm lut thei bik Curry hmun awl pek loh a fuh ang.