Match hnih atan Pep an hrem

Europe football thuneitu sang UEFA chuan Manchester City manager Pep Guardiola chu match hnih chhung atan an hrem. Season thara UCL match hmasa berah Pep hian mipui zing aṭangin a naute inkhel a en a ngai dawn a, match khat dang hi kum dangah a ni thung ang.

April 10 khan Man City hian Etihad Stadium-ah Liverpool an mikhual a, chawlhlawk an hman dawnin kum 47 mi Guardiola hian referee Mateu Lahoz thutlukna chu nasa takin a sawisel a, hnawhchhuah a ngaih phah hial.

Barcelona manager hlui Guardiola hian referee Mateu Lahoz chu zah lo takin a ânkhum hran loin niin a sawi a, a thutlukna dik lo chu a duh loh zia a lantir mai niin a sawi. City hi an mualah 2-1 a an chak loh avangin inkhel pahnih belhkhawmah Reds hi 5-1 ngawtin an ngam lo a ni.

Guardiola an hrem rual hian Liverpool pawh an bang bik lo, English club hi quarterfinal leh semifinal-a fans chet dan mawi lo vangin £25,450 chawitir an ni. Reds ṭantute hian City team bus an beih bakah, Serie A club Roma nen an inkhelh ṭumin khelmualah hal mawi an hal bakah bawlhhawlh an vawm lut.