Indian Premier League: Team ṭha ber Mumbai Indians an champion

Mumbai Indians chuan Thawhlehni zan khan Delhi Capitals wicket ngain an hneh a, a vawi nga nan Indian Premier League-ah an champion. Dubai International Stadium-a final khelhah hian Delhi Capitals-in over 20-ah run 156/7 an siam a, Mumbai-in over 18.4-ah run 157/5 in an chhanglet a, hnehna an chang.

Mumbai bowler Trent Boult chuan final-ah run 30 chauh pein wicket thum a la a, player of the match-ah an thlang. England pace bowler Jofra Archer chuan Rajasthan Royals tan wicket 20 a lak bakah run 113 a siam a, six vawi 10 vaw chhuakin most valuable player-ah thlan a ni.

Delhi Capitals-in vuak hmasak an thlang a, Trent Boult-a'n ball khatnaah Marcus Stoinis a vawm hlum nghal. New Zealand bowler Boult hian Ajinkya Rahane leh Shimron Hetmyer te a vawm hlum leh a, final-ah run 30 chauh pein wicket thum a la.  Tun inelnaa run 618 zet siamtu Shikhar Dhawan-a'n run 15 lek a a siam a, Ajinkya Rahane-a'n run hnih chauh a thawh bawk.

Delhi-in wicket thum an hloh hian run 22 chauh an la siam a, captain Shreyas Iyer rawn che ṭhain thi loin run 65 a rawn siam. Iyer thlawp tur hian Rishabh Pant pawhin ball 38 lekah run 56 a rawn siam bawk.  Iyer hoten target ṭha zawk siam theih an inbeisei a, amaherawhchu Mumbai lamin over hnuhnung pathum aṭangin run 20 chauh an pe. 

Season liam ta final-a player of the match Jasprit Bumrah-a'n wicket la lo mah se over li aṭangin run 28 chauh a pe a, Jayant Yadav (25/1) leh Nathan Coulter-Nile (29/2) te an chet ṭhat bawk avangin Delhi hian run 156/7 chauh an siam.

Mumbai inlan hun a thleng a, final pressure sangah captain Rohit Sharma a rawn inlar. India opener hian ball 51-ah run 68 siamin batsman dang Quiton de Kock (20), Ishan Kishan (33) leh Suryakumar Yadav (19) ten rawn belh ve bawkin over 18.4 lekah target an umpha a, hnehna an chang.

Mumbai hian league round-ah point 18 hmuin pakhatna an ni a, final-a an hmachhawn Delhi Capitals hi tun season-ah vawi li ngawt an hneh. League round-ah vawi hnih an hneh hnuin qualifier 1 leh final-ah an hneh leh a ni.

Delhi Capitals head coach Ricky Ponting chuan, "Mumbai-in fak an phu. IPL chhung zawngin team ṭha ber an ni a, champion hi an phu hliah hliah a ni," tiin an khingpui a fak.

Mumbai Indians captain Rohit Sharma chuan, "Tun inelna kan hmachhawn danah ka hlim hle. Inelna ṭantirh aṭangin chak kha kan tihturah kan ngai chho a, player zawng zawng an che ṭha, hei aia ṭha ka beisei lo," tiin an khelh danah a lungawi hle.

Indian Premier League 2020 hi inelna vawi 13 neihna a nih avangin IPL13 tih a ni bawk. Sponsor-tu hming chawiin  Dream11 Indian Premier League 2020 tih a ni. 

Inelna hi March 29, 2020-a ṭan tur ni mah se Covid-19 vangin sawn a ni a, India ram chhungah coronavirus in zual lam a pan zel avangin India ram pawnah khelh a ṭul phah.

Inelna hi September 9 - November 10 chhung khan United Arab Emirates-ah khelh a ni a, stadium pathum Dubai International Cricket Stadium (Dubai), Sharjah Cricket Stadium (Sharjah) leh Sheikh Zayed Cricket Stadium (Abu Dhabi) ah khelh a ni.

IPL-ah Mumbai Indians vawi nga an champion tawh a, anmahni hnaih ber tu Chennai Super Kings vawi thum champion tawhin vawi hnih champion tawh Kolkata Knight Riders-in an dawt. Deccan Chargers, Rajasthan Royals leh Sunrisers Hyderabad te vawi khat ṭheuh an champion tawh bawk.