Premier League club-in mipui an ṭanpui
April 30 thleng Premier League khelh a nih loh thu tihchian a ni tawh a, coronavirus vangin club-ten football lam an hawi thei lo. English club-te hian khawtlang ṭanpuina kawngah an thawh hlawk hle.
AFC Bournemouth : England-ah school an khar tak avangin Cherries hian online-in naupang zirtirna an hawng. Arsenal : Gunners pawhin kum naupang leh upa te an khawhar tur ngaihtuahin an staff-te'n phone hmangin an bia a, 'online' hmangin zirtirna an kalpui bawk.
Aston Villa : Villa pawhin naupang, upa leh chanhai te ei turin Birmingham-ah ei tur an sem a. FareShare leh Foodbanks nen thawk hoin khawtlang tan an ṭangkai hle.
Brighton & Hove Albion : Brighton pawhin Arsenal nen an inkhelh leh tak loh avangin an ei tur sem tur zawng zawng chu Sussex Homeless Support tan an pe. Fahrah in te hian an ei phak loh tur VIP an dawn avangin an lawm hle.
Burnley : Burnley player-te'n sum thawh khawmin khawtlang ei tur lakkhawm kawngah an pui.
Chelsea : Blues-in an stadium Stamford Bridge-a Millennium Hotel chu National Health Service (NHS) staff te awm an phalsak a, NHS lam pawhin an pawm. NHS-in an mamawh zat a zirin Blues hi room an pe ang a, chutihrualin Covid-19 rinhlelhawm erawh an awm a rem lo thung.
Crystal Palace : Eagles-in club ṭantute khawtlang ei tur pe khawm turin an ngen a, player-te pawhin hemi kawngah hian ṭan an la bawk.
Everton : Toffees chuan hun harsaah khawtlang puih nan £50,000 an pe a, 'Blue Family campaign' neiin ṭanpui ngaite puih dan tur an duang. Toffees hian ei tur an sem a, ei tur nei lote sum hmangin an ṭanpui a, mahni chauha awm te an mobile phone an recharge sak a, electric leh gas bill te an peksak bawk.
Leicester City : Foxes staff-te pawhin ei tur leina dawr lian Central England Coop an pui.
Liverpool : Reds-in khawtlang puih nan £40,000 an theh chhuak. Anfield stadium-a duty ṭhinte pawhin khawtlang puiin kum lama upate an pui a, parking fel fai a awm theih nan an pui a, mipui te thil lei tur te an awmze neiin an rem bawk.
Manchester City : City chuan khawtlang tan ei tur an pe a, United nen ṭangkawpin khawtlang ei tur lei nan £100,000 an pe bawk.
Manchester United : United-in a ngheta thawk lote hlawh pek ngei an tum a, City nen ṭangkawpin khawtlang ei tur lei nan £100,000 an pe bawk.
Newcastle United : Magpies-in Sheffield United nena an inkhel tur an sawn tak avangin an ei tur siamsa chu mamawh te tan an pe.
Norwich City : Canaries chuan mipui puih nan Covid-19 laka inven dan tur thuchhuah an siam.
Southampton : Saints Founda-tion chuan mipuite hriselna thlirin online exercise an buatsaih.
Tottenham Hotspur : Spurs-in stadium-a ei tur chuang liam chu Felix Project tan an pe a, London khawpui leh a chhehvela ei tur nei lo tan an che chhuak bawk.
Watford : Hornets chuan anmahni ṭantute chu kum lama upate leh naupangte tana thawk chhuak turin an ngen.
West Ham United : Hammers star Declan Rice chuan club ṭantu kum lama upa te phone hmangin a be kual a, club-in kum upate puih dan an duang bawk.
Wolverhampton Wanderers : Wolves chuan Woverhampton khuaa Covid-19 do tute hman turin invenna thawmhnaw an pe.