Solskjaer chhanhimtu Ronaldo
Manchester United-in Pathianni zan khan Tottenham Hotspur stadium an tlawh a, Ole Gunnar Solskjaer hmalam hun hriltu inkhel pawimawh a ni. Goal khungtu Cristiano Ronaldo-a'n a thiam thil pholangin Man United hi Spurs lakah 3-0 in an chak a, tun dinmunah chuan Solskjaer-a ban tumna thawm ri ring tak pawh a reh leh rih.
Ronaldo hian minute 39-naah Portugal tana a khelhpui Bruno Fernandes siamsak chu ṭha zetin a volley goal. Minute 64-naah Ronaldo hi a siamtu a ni ve leh thung a, Portugal captain pass chu Edinson Cavani-a'n a khung. Minute 86-naah substitute Marcus Rashford-a'n chak nemnghehna goal class takin a khung.
Game plan thar
Liverpool laka 5-0 zeta an mualpho hnuah Man United an tlusawp a, tho chhuak turin hun an mamawh dawn niin a lang. Amaherawhchu kar khat hnu lekah Solskjaer-a'n an khelh dan 4-2-3-1 chu 3-5-2 ah a rawn thlak a, team dang daih an ni.
Spurs hmachhawn turin Raphael Varane a dam tawh a, Harry Maguire leh Victor Lindelof te nen an inkawp. Mual sira awm Luke Shaw leh Aaron Wan-Bissaka te chu an tawlh hma hret.
Midfield lai a danglam tam lo a, sawisel hlawh McFred an tih mai Scott McTominay leh Fred te chu Bruno Fernandes te nen an inkawp a, tlarhmaah tawnhriat nei ngah Ronaldo leh Cavani te an awm.
A hlawhtling
Mualneitu Tottenham-in ball chang tam mah se coach pahnih Nuno Espírito Santo leh Solskjaer te inbeihnaah Norwegian manager a chungnung zawk. Spurs-in minute 90 chhungin goal zawnah an pet lo a, first half-ah Son Heung-min-a'n chance nei ve bawk mah se goal zawnah a pet lo - goal ta reng pawh ni se offside vangin pawm a ni lo ang.
England captain Kane chu Maguire leh a hoten an phum bo a, Man United player-ten an pu Solskjaer tan theihtawp an chhuah tih a lang. Reds laka red card hmu Paul Pogba, player thar Jadon Sancho leh rawlthar duhawm Mason Greenwood te tel loin Man United-in football nung tak an khel a, chak an phu ang ngeiin an chak bawk.
Ball chan tam tawk loh vangin Ronaldo-a'n sawisel hlawh mah se a finishing ṭha zet hmangin amah seltute ka a hup a, goal ropui bakah hian goal ṭha dang khung mah se offside vangin a goal hnihna pawm a ni lo.
United tlarhnung a phui ṭha a, Fernandes-a'n rintlak a ni tih a pholang a, Ronaldo leh Cavani te an inkawp rem avangin Solskjaer chungah beiseina thar a nghah leh theih ang.
Amaherawhchu match khat leka thutlukna siam erawh a rem lo a, Man United hian November 2, Thawhlehni zan hian Italy-ah Atalanta an hmachhawn dawn bakah kartawp hian Manchester City an mikhual dawn. Solskjaer leh a hote dinhmun tak a hriat theih ang.
Tawnhriat nei ṭha
Man United manager Ole Gunnar Solsjkaer chuan, "Cavani leh Ronaldo te tawnhriat kha a pawimawh a, kan mamawh tak pawh a ni. Hun harsa tak kan hmachawn a, hetiang hunah hian tawnhriat nei ṭha an pawimawh," tiin tlarhmaa inkawp Cavani leh Ronaldo te a fak.
Tlarhnung chungchang sawiin Ole chuan, "Kar tluanin kan zir a, kan zir angin an khel chhuak. Varane hi player ṭha bik a ni a, game a chhiar thiam avangin a hun milin a inthlak danglam thiam. A rawn let kha kan hlawkpui hle," tiin a sawi.
Spurs erawh an chak loh avangin Nuno Espírito Santo-a'n pressure a ngah a, mipuiin an auh el hial avangin Portuguese manager hian a hna hi hun rei zawk chelh a duh a nih chuan result ṭha a neih vat a pawimawh ang.