Liverpool tlarhnung a nghing

Manchester United an sawp hnu lawkah Liverpool-in Brighton & Hove Albion an mikhual a, minute 30 hmain 2-0 in hma hruai hman mah se an mikhual hi si phurh an sut zawhtir a, a tawpah 2-2 in inkhel a tawp.

Liverpool tan captain Jordan Henderson chuan minute lina lekah goal hmahruai a khung a, yard 18-na vel aṭanga English midfielder goal khung hi Mohamed Salah siamsak a ni.

Minute 20 a liam a, Liverpool bawk kan hmu - Sadio Mane chuan hliam vanga lakchhuah Naby Keita thlaktu Alex Oxlade-Chamberlain siamsak chu a tauh lut a, 2-0 a ni fel der!

Anfield-a inkhel an ni bawk a, Reds fan-ten awlsam taka chak mai tura an inngaih laiin an beisei ang erawh a ni lo - minute 41-naah Enock Mwepu chuan Alisson rawn tawlh chhuak chu hmuin, yard 25 vela hla aṭangin mawi zetin si phurh a sut ṭhen.

Liverpool-in goal an khung nawn tawh lo - Reds player hlui Adam Lallana siamsak chu Leandro Trossard chuan goal-ah a chantir a, hun tawp thlenga goal dang lut loin 2-2 in an inhnehtawk.

Anfield-a point hlawh chhuaktu Brighton-in fak an phu a, Tossrard-a pass mawi lutuk hmanga Solly March-a chance neih te leh Yves Bissouma-a post pet per te kha lut ngat se mahni mualah Reds chu mualpho thei an ni.

Liverpool tan Mane-a'n a goal hnihna a khung niin ngai mah se a handball avangin pawm a ni lo a, Salah-a goal khung pawh offside vangin pawm a ni lo - Brighton forward Trossard-a'n a goal khung offside vanga pawm loh chu a ui viau bawk ang.

Reds manager Jurgen Klopp chuan, "First half-ah kan khel ṭha a, ball pass mawi tak tak pawh kan hmu a, mahse, 2-0 chiah a ni kha a pawi a ni. Second half-ah kan khel ṭha tawk lo a, ka naute khelh dan khan min tilawm lo.

"Brighton laka inven dan ṭha ber chu ball chan tam a, hmun awl laia ball inpek tam a ni a, mahse, chu chu kan ti si lo a ni," a ti.

Virgil van Dijk awm hnuah pawh Liverpool tlarhnung beisei angin an la phui thei lo a, league match 10-ah goal riat an chhuah tawh - an elpui Chelsea (3 goals) leh Manchester City (6) te goal chhuah dan thlirin champion an tum chuan insiamṭhat an mamawh tih a lang.

Liverpool hian Nilaini zan dar 1:30-ah Champions League match khel turin Atletico Madrid an mikhual dawn a, match thum an khelh tawhah an la chak vek avangin Atletico an hneh chuan last 16 an lut ang.