Real chak laiin Barca chak zo lo

Kartawp La Liga inkhelah Real Madrid chuan 2-1 in Elche an hneh a, Real chak thu hre saa inlan Barcelona erawh an chak zo lo - an mikhual Alaves nen 1-1 in an inhnehtawk.

Real tan Vinícius Júnior chuan a season hman ṭhat chhunzawmin goal hnih a khung a, Elche tan Pere Milla chuan si khat sut ṭhen mah se a team tan phurna a thlen zo lo. Real-in league-ah hma an hruai a, nizana Real Sociedad inkhel result a zirin table hi la danglam leh thei a ni thung.

Barcelona-in an elpui Real chak thu hre sain Alaves an mikhual a, Memphis Depay-a'n goal hmahruai khung mah se Luis Rioja chuan Alaves tan si phurh a sut.

Inkhelh zawha Barca result aia sawi hlawh zawk erawh Sergio Aguero a ni a, Argentine striker hi Catalan club tana bul a ṭan hmasak berah thawk lamah harsatna a tawk a, lakchhuah a ni.

Real tan Vinícius
Hliam vangin Karim Benzema-a'n bul a ṭan thei lo a, mahse, French striker inlan thei lo mah se Real Madrid-in Vinícius Júnior an nei a, goal khung kawngah harsatna an nei lo.

Carlo Ancelotti hnuaia harhtharna chang forward hian minute 22-na lekah Mariano Díaz siamsak aṭangin goal hmahruai a khung a, minute 73-naah a khung leh bawk.

Brazilian forward-in a goal hnihna a khung hma hian Elche CF attacking midfielder Raul Guti chu Toni Kroos laka a foul avangin hnawhchhuah a ni a, a tam zawk ni chungin Real an khel.

Hun tawp nan minute li chiah a awm tawh tihah Elche hian Pere Milla hmangin si phurh an sut ṭhen a, sut zo tur erawhin hunin a daih tawh lo a, Real an chak.

Real an vannei
Club tenau Elche khelmuala chak turin Real-in vanneihna an mamawh tel a, Elche lam ke hmui zan ni ngat se mualneitu team hi chak thei an ni.

Argentine striker Lucas Boyé chuan Elche tan goal hmahruai khungna remchang a nei a, mahse, Thibaut Courtois chuan kum 25 mi striker shot chu ṭha zetin a dansak.

Arsenal striker hlui Lucas Perez-a'n goal khungna remchang a neih chu holam takin a hlah bawk - Real tana Vinícius ṭhatna erawh sawi bo a rem lo a, he forward hian hmabak a nei êng ta hle.

Kum 21 mi forward hian Real tan tun season inelna hrang hrangah match 14 khelin goal kua a khung tawh a, assist vawi nga a nei bawk.

A thar thei lo!
Barca-in coach Ronald Koeman an ban a, Dutch coach an ban hnua coach lailawk Sergi Barjuan hoin an match hmasa ber an khel - mahse, an mikhual Alaves chu 1-1 in an inhnehtawkpui thei hram.

Mipui 90,000 chuang lenna Nou Camp-ah fans 37,000 bawr vel chiah an pungkhawm a, Catalan club chungah fans beisei a tlem tawh tih chiang takin a lang.

Barca tan Eric Garcia chuan goal hmahruai khungna remchang nei mah se Alaves goalkeeper Antonio Sivera chuan a dansak a, an goal hmasa ber khung turin second half an nghah a ngaih phah.

Depay chuan minute 49-naah goal a khung a, mahse, Barca lawm chhung a rei lo - minute thum hnu lekah Alaves-in winger Rioja hmangin an chhanglet a, 1-1 a ni.

Barca & buaina
Alaves-in si phurh an sut hnu lawkah Depay chuan Barca hmahruai nawnpuina remchang nei mah se Gavi ball pek aṭanga a chance neih chu post tih per nan a hmang.

Philippe Coutinho pawhin hming chherna remchang a nei a, mahse, Alaves keeper Sivera chuan Brazilian midfielder hun duhawm neih hi a dansak bawk.

Minute 42-na lekah Aguero chu a thawk lama harsatna a tawh avangin lakchhuah a ngai a, Argentine striker hi a awm vuan chungin a mu a, khelmuala enkawlna pek a nih hnuah ambulance hmanga damdawi in panpui a ni.

Barca coach Barjuan chuan, "Sawi belh tur vak a awm rih lo. Damdawi inah an hruai a, test an nei a ni," tiin a sawi a, he thu buatsaih a nih thleng hian Aguero test result hi sawi a la awm lo.