Chak loh thiam lo Chelsea

Thomas Tuchel hnuaiah Chelsea-in point thum hlawh chhuak loa inkhelh dan an theihnghilh tawh - an chak zo dawn lo emaw tih hnuah pawh goal an khung leh ṭawk ṭhin!

Blues hian Inrinni zan khan an mikhualna ramah Newcastle United chu 3-0 in an sawp a, Reece James chuan goal hnih a khung bakah Jorginho chuan penalty hmangin goal khat a thawh ve bawk.

Magpies-in neitu thar neiin hausa thut mah se player thar an la nei lo a, coach thar an la nei lo bawk a, an mikhual Chelsea lakah goal khat lek pawh an khung ve thei lo.

Minute 60 thleng pawhin Chelsea-in goal an khung thei lo a, hetihlai hian Liverpool chuan Brighton lakah hma an la hruai bawk - khatihlai khan inkhel tawp ta se Reds-in table chung ber an luah ang a, Chelsea chu pahnihnaah an awm ang.

Mahse, Thomas Tuchel-a nauten ngaihdan dang an nei. James chuan minute 65-naah Callum Hudson-Odoi-a cross aṭanga ball kal tauh per, a ke bula a tlak hnuah chiang zetin a pet goal.

Minute 12 a liam a, Ruben Loftus-Cheek-a shot chu Magpies player-ten an dan per hnuah James bawkin a shot leh a, a goal - tun season-a league match sarih a khelha goal li a khungna a ni a, assist vawi hnih a nei ta bawk.

Magpies goalkeeper Karl Darlow-a'n Kai Havertz lakah penalty a chawi zui a, Jorginho chuan goal-ah a chantir - Blues tan goal khung tura hlawh pek Romelu Lukaku leh Timo Werner te hliam vangin an la chawl a, dam lohna avangin Mason Mount a inlan thei lo bawk. Heti chung hian Chelsea-in goal khung an harsat lo a, hma an hruai chhunzawm zel.

Blues hian Thawhlehni zan dar 11:15-ah Champions League match khel turin Malmo an lenchilh dawn a, match thum khelhah point ruk an neih mek avangin an chak chuan last 16 luhna chance a sang sawt ang.