Arsenal boruak a fuh laklawh

Goal hnih an khung a, anmahni lama lut tur chu keeper Aaron Ramsdale-a'n a lo dang zel - Arsenal boruak a fuh laklawh. Mikel Arteta naute hian Gabriel leh Emile Smith Rowe te goal hmangin Leicester City 2-0 in an hneh.

King Power Stadium-a inkhelah Bukayo Saka-a corner chhuih chu defender Gabriel-a'n a tauh lut a, English winger Saka ball lakluh kal zelah a ṭhianpa Emile Smith Rowe chuan an goal hnihna a khung bawk.

Hale End chhuak Saka leh Smith Rowe te an chet ṭhat avangin Gunners ṭantute an lawm. Season tir lama 'Arteta Out' titute pawhin Spanish manager lakah rinna an nei thar ve leh ta - eng chen nge an thlen dawn erawh hriat a la ni lo.

Nipui bazar lai khan Arsenal hian sum an hmang hnem, season bul an ṭan chhiat avangin sawisel an hlawh nasa. Mahse, Foxes lakah khan an player thar panga - Ben White, Ramsdale, Takehiro Tomiyasu, Albert Sambi Lokonga leh Nuno Tavares ten an khel vek.

Player thar panga hi an hmuhnawm, midfielder Granit Xhaka leh Kieran Tierney te hmun ruak luahtu Lokonga leh Tavares te khelh dan khan Gunners ṭantute thla a timuang ngei ang, tunah chuan a zawnin Premier League match sarihah tlawm an nei ta lo.

Pound maktaduai 30 senga Ramsdale an lakluh khan mi mak tih a hlawh, keeper Bernd Leno thachhang dawltu tur man atan chuan tam tih a hlawh hle. Mahse, hun rei lote chhungin English goalkeeper hian hmun nghet a chang thei der tawh.

Kum 23 mi Ramsdale hian James Maddison-a freekick chu ṭha zetin a dansak. Foxes lam goal khung tur ṭum riat ngawt a dang a, tlarhma lam goal khungtu an lansarh tluk zetin a hnung si ban nghaktu hi a pawimawhin a langsar ve bawk.

Arteta naute hi season tir khan Premier League match hmasa pathumah an tlawm vek. Manchester City lakah 5-0 teh meuhin an mualpho a, a hnu lamah erawh hmalam an pan zel - tunah chuan Pep Guardiola naute an phak lohna chu point thum chiah a ni leh ta.

European football an khelh loh avangin kar tluanin league atan inbuatsaihna an nei zui thei dawn. November 7, Pathianni hian Watford an mikhual dawn, chumi hnua Liverpool an lenchilh tur chu an tan fiahna a ni ang.