Palace-in Man City an barakhaih

Crystal Palace-in Inrinni zan khan Etihad Stadium an luhchhuah a, Wilfried Zaha leh Conor Gallagher te hmangin Premier League champion Manchester City 2-0 in an hneh.

Pep Guardiola hoten inkhel thunun mah se vanduai ṭum an tawng a, Aymeric Laporte chet fuh tawk loh vangin Zaha-a'n minute rukna lekah a khung. Kum 28 mi Zaha hi Crystal Palace tana Premier League-a goal 50 khung thei hmasa ber a ni.

Laporte hi first half injury time-ah a chesual nawn a, Zaha a pawh thluk avangin referee Andre Marriner-a'n red card a pe nghal. Player 10-a khel chungin Man City-in goal hlauhawm an ngah a, Gabriel Jesus goal khung chu offside vangin pawm a ni lo.

Palace erawhin an hun ṭha neih an hmang ṭangkai a, minute 88-naah Conor Gallagher-a'n chak nemnghehna goal a khung. Pep Guardiola chuan, "Red card leh yellow card chu referee thu a ni a, kan goal khung an pawm loh vanga chak lo pawh kan ni lo. Tihsual kan ngah a, kan chet ṭhat tawk loh vanga chak lo kan ni," tiin an khelh ṭha tawk lo tih a pawm.