PSG chakna Angel Di Maria

Angel Di Maria-a'n goal a khung bakah assist vawi khat a nei a, inkhel hmunawm takah Paris Saint-Germain chuan Ligue 1 champion lai Lille 2-1 in an hneh a, player langsar Lionel Messi chu hliam vangin a khel tluan ve thei lo.

PSG manager Mauricio Pochettino-a'n Messi dinhmun a chian loh thu sawi mah se a bul ṭantu zingah a tel tir a, forward Kylian Mbappe erawh hliam vangin squad-ah telh a ni ta lo - Paris club hian goal khung an harsat.

France champion lai Lille hian chawlhlawk hmain Jonathan David hmangin goal an nei hmasa, hliam vangin Messi thlak a ngai zui a, anmahni mualah ngei PSG hi mualpho thei dinhmunah an ding.

Minute 74-naah Di Maria a inlar, Argentina international hian captain Marquinhos-a goal khung tua a siamsak a, hun tawp hma deuh chiahin chakna goal a khung leh bawk - chak lo tur dinhmuna ding hman tawh kha Di Maria vangin point thum an hlawh chhuak.

PSG manager Poch chuan, "A bul ṭan chhe mah ila ka naute khan a tawp thlengin an theihna zawng zawngin an bei. Lille hi team ṭha tak an ni a, te tan pawh hmachhawn an awlsam lo ang, keini ngei pawhin harsa takin point thum kan hmu hram," tiin vanneih vanga chak an ni tih a zep lo.

Paris club hian Nilaini zanah Champions League khel turin RB Leipzig an lenchilh zui leh ngal dawn. UCL-ah hian Messi an chhawr thei dawn nge dawn lo an la sawi chiang thei rih lo a ni.