Hnehna nen Bayern an inlar leh ta

Bayern Munich chu German Cup lama an mualpho hnuah ropui takin an lo kir leh ta. Bavarians hian Union Berlin lakah 5-2 in hnehna an chang a, point 25 hmuin Bundesliga table chung berah an awm.

Robert Lewandowski-a'n penalty aṭangin a khung ṭan a, Polish striker hian an goal hnihna a khung bawk. Lewy bakah hian Leroy Sane, Kingsley Coman leh Thomas Muller ten goal khat ṭheuh an khung bawk.

German champion hi an match hnuhnung zawkah khan Borussia Monchengladbach lakah 5-0 ngawtin an mualpho a nih kha. Hun rei lote chhungin an insiamṭha leh tawh tih a chiang a, kar laihawla Benfica nen Champions League an khelh hunah pawh chak tura rinkai an ni leh ang.

Bayern hi an coach Julian Nagelsmann-a'n Covid-19 vangin a la enkawl thei lo, assistant manager Dino Toppmoller chuan, "Kan chak loh hnua kan match hmasa berah hetiang zat goal kan khung thei hi ka lawm. A tir lamah bul kan ṭan fuh a, minute 30 kan khelh tlin kha chuan ka lungawi tawh hle," a ti.

Inkhel dangah Borussia Dortmund chuan FC Cologne 2-0 in an hneh. Signal Iduna Park-a inkhelah hian Thorgan Hazard leh Steffen Tigges ten goal khat ve ve an khung a, point thum hmuin hmahruaitu an phak lohna hi point khat chiah a ni.