Juventus an tlawm leh ta

Massimiliano Allegri enkawl Juventus an che fuh hleithei lo. Old Lady hi han phur ve hluai dawn ṭhin mah se an chak lo leh zel. Inrinni zan Serie A inkhelah Allegri naute hi Hellas Verona lakah 2-1 in an tlawm.

Mualneitu Verona tan Giovanni Simeone chuan minute 10 leh 14-naah goal a khung a, khualmualah Juventus hi nasa taka mualpho thei dinhmunah an ding, mahse second half-ah Juve hian tlarhnung an venghim tawh, midfielder Weston McKennie hmangin goal khat nei mah se awmzia a nei phak lo.

Juventus tan chak loh a pawi a, mualphona a tling bawk. Serie A match 11 aṭangin point 15 an hmu a, an hneh loh Verona nen an point hmuh a inzat - match khata khel tam chungin hmahruaitu Napoli an phak lohna chu point 13 lai a ni tawh.

Juve manager Allegri chuan, "Inkhel ṭhenkhatah chuan rilru kan pek tawh loh vanga chak loh chang a awm thei, tun ṭumah pawh khan a pumpui thlir khan 100% rilru kan pek tawk loh kha kan tuar," tiin a sawi.

Inkhel dangah team ṭha Atalanta leh Lazio te 2-2 in an inhnehtawk a, team pahnih hian champion tum ngam chiah lo mah se season thara Champions League khelh tum tur zinga mi an ni dawn. Match dangah Torino chuan an mikhual Sampdoria 3-0 in an sawp thung.