Pakistan tan Asif Ali a che ropui

India leh New Zealand hnehtu Pakistan chuan Zirtawpni zan khan Afghanistan chu wicket ngain an hneh a, T20 World Cup semifinal an luh ngei a rinawm. Shaheens chak theih nan Asif Ali-a'n ball sarih lekah 25 runs a siam a, player of the match-ah an thlang.

Dubai-a inkhelah Afghanistan-in bat hmasak an thlang. Afghan top order te che ṭha lo mah se captain Mohammad Nabi (35*) leh Gulbadin Naib (35*) te chet ṭhat zarah 147/6 runs an siam.

Pakistan captain Babar Azam-a'n 51 runs a siam a, Fakhar Zaman-a'n 30 runs rawn belh mah se chak turin vanneihna an mamawh tel. Over hnih a la awmin Shaheens hian 24 runs an la mamawh.

Over 19-naah Asif Ali a rawn inlar a, six runs ṭum li vaw chhuakin an mamawh zat 24 runs an siam. Pakistan hian vawi thum chakah vawi thum hnehna an chang a, point ruk an hmuh tawh bakah team nem pahnih Namibia leh Scotland te an hmachhawn dawn avangin knockout stage lut ngei turah an ngaih theih.

Pakistan captain Babar Azam chuan, "Asif Ali hi a rintlak tih ka hria a, inrintawkna nena a tawp min thlenpui kha a ropui hle," tiin hnehna chanpuitu kum 30 mi Asif Ali a fak.