England-in Australia an sawp

T20 World Cup-ah Inrinni khan champion rinkai pahnih England leh Australia te an inkhel a, Three Lions wicket riatin an chak. Eoin Morgan-a hote hi match thumah an la chak vek a, an elpui ber Australia an hneh bawk avangin semifinal an hnaih hle.

England hian zanin dar 7:30 hian Sri Lanka an hmachhawn dawn a, hnehna an chang a nih chuan semifinal lut hmasa ber an nih theih dan a awm ang.

Dubai-a inkhelah England-in vawm hmasak an thlang. England tan Chris Woakes a che ṭha a, David Warner leh Glenn Maxwell te a vawm hlum bakah Steve Smith-a'n run khat chauh a la siam tihin ṭha zetin a ball vuak a mansak.

Captain Aaron Finch-a'n ball 49-a 44 runs a siam bakah lower batsman te an chet ṭhat avangin over 20-ah 125 runs an tlin ta tho. Amaherawhchu Aussies mualpho tur erawh a hliahkhuh pha chuang lo.

England tan opener Jos Buttler-a'n ball 32 lekah 71 runs a siam a, Three Lions-in 11.4 overs lekah 126/2 runs siamin hnehna an chang. Captain Morgan chuan, "Australia laka kan chak dan a lungawithlak hle. Roy leh Buttler ten fak an phu. Eng team pawh hi an ṭha vek a, tumah dah hniam theih an ni lo," tiin semifinal thleng tura fimkhur a la ngaih thu a sawi tel bawk.