Premier League doctor an fimkhur

Premier League doctor chuan club thuneitute chu thurawn pe lawkin June 30-a Premier League zawh a nih chuan player inhliam an tam tur thu an sawi.

Tuna a lan dan chuan Premier League hi khelh ṭan leh theih a nih pawhin May 1-ah ṭan a ni leh dawn chauh a, June 30-a inelna zawh a nih chuan players tan match inkarah hahchawlhna hun ṭha a awm lo ang.

Team khatin kar khatah match hnih aṭanga match thum thleng an khelh a ṭul a rinawm a, European inelna leh FA Cup tel tan chuan hmabak a harsa lehzual dawn. 

Club pakhat doctor chuan, "Inrinnia inkhelh a, Nilainia inkhelh leh a, Inrinnia inkhelh leh chu a theih. Amaherawhchu thil chiang sa erawh inhliam an tam dawn tih a chiang. Chutihrualin hetiang hun hi squad chhah ṭha neih hun a ni thei tho bawk," tiin inhliam an tam a rin thu a sawi.

Doctor chuan sawi chhunzawmin, "Player-ten inkhelh hautak an hmachhawn chuan anmahni pawh an hriam ve zel a, chutihrualin an inhliam erawh chuan an inhliam rei thung. Tun hmaa inhliam ngun player-te dinhmun a derthawng ang," tiin a sawi.

Inhliam vanga hun rei tak chawl tawh Premier League player langsar Tottenham striker Harry Kane leh Manchester United forward Marcus Rashford te pawh inelna ṭan a nih hunah chuan an inlan leh thei tawh dawn a, inelna an ṭan leh thei a nih chuan Covid-19 vangin match an khelh tam theih phah dawn tihna a ni.