Olympic aṭangin Canada inhnukdawk

Coronavirus vangin infiamna khawmpui lian ber Olympic 2020 pawh dinhmun chiang lo takah a ding mek, ram inlan tur zinga mi Canada chuan an inhnuhdawh thu an puang - Tokyo Olympic hi an nei thei ang em tih chu zawhna lian tak a ni mek.

Japan khawpuia inelna hi ruahman dan chuan July 24 aṭanga neih tur a ni. Mahse, Covid-19 vangin Japanese prime minister Shinzo Abe chuan tun hnai khan sawn mai thei dinhmuna an din thu a sawi.

Canada ram Olympic leh Paralympic committee chuan thuchhuah siamin, "Thutlukna harsa tak a ni. A hun sawn leh thutlukna dang chu kan ngaichang reng. Tun dinhmunah chuan thil dang zawng zawng aiin infiammite leh khawvel hriselna hi a pawimawh ber," an ti.

Twitter lamah Canada hian sawi zawmin, "Naktuka hnehna i puan theih nan vawiin thlah rawh. Infiamna huanga thil tih, record ropui leh medal ai chuan hriselna hi a pawimawh zawk," tiin an tarlang zui bawk.

Canada hi langsar taka Tokyo Olympic aṭanga inhnukdawk hmasa ber an ni a, ram ṭhenkhatin an hnung an zui a nih pawhin a mak lo ang. World Athletics president Lord Coe chuan inelna neih hun hi sawn mai an duh thu a sawi.

Australian team pawh la inhnukdawk chiah lo mah se kuminah neih theih an inring lo, an ram infiammite chu '2021 Olympic' atana inbuatsaih turin an ti, kumin chhunga neih theih an ring lo hle.

Japanese official lam chuan Tokyo Olympic hi ruahman angin a hun ngaiah neih theih an beisei thu an sawi reng a, prime minister Shinzo Abe pawhin kar hmasa mai khan an dinna ngaia an la din thu a sawi.

Mahse, nimin khan parliament-ah Abe hian thu a sawi a, a thu chhuak a danglam ta. Abe chuan, "Tokyo Olympic hi a nih dan tur taka kalpui chu a harsat a rinawm tawh. Infiammite hriselna hi ngaih pawimawh ber a nih avangin loh theih lohna vangin sawn pawh a ngai mai thei," a ti.

Olympic hi harsatna lian tham tawpkhawk a thleng a nih ngawt loh chuan ṭhulh emaw sawn emaw a ni ngai lo. Kum 1940 khan Indopui II-na vangin neih theih a ni lo tawh, hemi ṭum pawh hian Tokyo-ah tho nghah a ni bawk.

International Olympic Committee (IOC) chuan Pathianni khan thuchhuah an siam a, thutlukna lian siam tur chuan chawlhkar li emaw tal nghah rih a la ṭha niin an sawi, dawhtheih hret a la ngai tihna a ni.

IOC chuan, "Olympic nei loh hian harsatna a su kiang kher lo thei, midang kan pui tihna pawh a ni kher lo thei. Mihring hian kan chunga thil thleng chhut fuh thiam loh chang kan nei fo.

"Thutlukna siam tur chuan hmanhmawh taka tih chi a ni rih lo ang, hetiang hun harsa leh thim tak hi ṭha taka kan paltlang tlan theih kan beisei, a tawpah chuan Olympic meichher hi a la de reng ang. Ṭhulh tumna chu a awm lo," tiin an sawi.

IOC president Thomas Bach chuan, "A ngaihna hre loin kan awm mek, Olympic Games Tokyo 2020 hi nei lo ta ila infiammi 11,000 zet duhthusam leh suangtuahna chu a tawp dawn tihna a ni," a ti. IOC hian a theih hram chuan Olympic hi kaltlang pui an tum niin a lang.