Emerging Player of the Year ni thei zingah Apuia

India rama football thuneitu sang ber All India Football Federation chuan season hman zawh taka Indian player ṭhangduang ber thlanna 'Emerging Player of the Year' atan nominee a ti chhuak a, hming chhawp chhuah zingah Lalengmawia a tel. 

Vaivakawn rawlthar Apuia hian season hman zawh takah khan Indian Super League-a a season hmasa ber a hmang a, NorthEast United tan match 10 khelin league-a Indian player langsar zingah a tel phak. 

Apuia hi Highlanders tana match 10-a khelhah hian vawi thum chu Emerging Player of the Match atan thlan a ni a, Hero of the Match-ah vawi khat thlan a ni bawk. 

AIFF Emerging Player of the Year ni thei zingah hian Apuia bakah Chennaiyin midfielder Anirudh Thapa, ATK rawlthar duhawm Sumit Rathi, Odisha FC right back Shubham Sarangi, Indian Arrows forward Vikram Pratap Singh leh Mohun Bagan midfielder Sheikh Sahil te hming chu chhawp chhuah a ni. 

Indian Super League (ISL) leh I-League club-a head coach-te chuan Indian rawlthar player ṭha ber thlang tur hian vote an thlak ang a, Player of the Year award atan coach-te hian an player duh zawng hming chu AIFF-ah an thehlut bawk ang.