Covid-19 vangin Real President hlui a thi

Real Madrid president hlui Lorenzo Sanz chu Inrinni khan coronavirus vangin damdawi inah a thi a, a fapa Lorenzo Sanz Duran chuan a pa thih thu hi twitter kaltlangin a puang chhuak. 

Kum 76 mi Sanz hian 1995-2000 inkar khan Santiago Bernabeu-ah President hna a chelh a, hetih chhung hian Real hian Champions League nomawi vawi hnih an chawi hman a ni. Sanz-a fapa Lorenzo Sanz Duran chuan, "Hetianga tawpna hman mai hi ka pa hian a phu lo. Pa huaisen, thawkrim leh mi ṭha tak a ni a, a chhungte leh Real Madrid hi a thinlung luahtu chu an ni," a ti. 

A hunlaia khawvela player langsar ber ber Roberto Carlos, Clarence Seedorf leh Davor Suker-te Real Madrid-a laluttu hian 2000 khan Real presidential election-ah Florentino Perez a ngam lo a, Perez hi tun thlengin Real President a ni. Sanz-a fapa Fernando Sanz chu Real Madrid tan1996-1999 inkar khan a khel a, a career tawp lam kum sarih erawh Malaga lamah a hmang thung.